న్యూఢిల్లీ, జూలై 24: టీబీని తక్కువ ఖర్చులో, వేగంగా గుర్తించడానికి భారత వైద్య పరిశోధన మండలి (ఐసీఎంఆర్) కొత్త టెక్నాలజీని అభివృద్ధి చేసింది. ‘సీఆర్ఐఎస్పీఆర్ టీబీ డిటెక్షన్’ అనే టెక్నాలజీని వాణిజ్యపరంగా వినియోగంలోకి తీసుకొచ్చేందుకు ఐసీఎంఆర్ పెద్ద ఎత్తున కసరత్తు చేస్తున్నది.
టెక్నాలజీని బదిలీ చేయటం ద్వారా ‘టీబీ డిటెక్షన్’ సిస్టమ్స్ తయారీపై వివిధ సంస్థలు, కంపెనీలకు ఆహ్వానం పలికింది. డిబ్రూగఢ్లోని ఐసీఎంఆర్ సైంటిస్టులు, రోగి లాలాజలం నుంచి డీఎన్ఏను తీసుకొని టీబీ బ్యాక్టీరియాను గుర్తించే టెక్నాలజీని అభివృద్ధి చేశారు. ప్రపంచంలోనే అత్యంత చవకైన పద్ధతిగా దీనిని వారు పేర్కొన్నారు. సుమారుగా 1500 శాంపిల్స్ను కేవలం రెండు గంటల్లో పరీక్షించి, టీబీ ప్రాథమిక లక్షణాల్ని గుర్తించవచ్చునని చెబుతున్నారు. ప్రాథమిక ఆరోగ్య కేంద్రాల్లోనూ (పీహెచ్సీ) ఈ పరీక్షలు నిర్వహించవచ్చునని ఐసీఎంఆర్ సైంటిస్టు ఒకరు చెప్పారు.