Shaikha Mahra | న్యూఢిల్లీ: దుబాయ్ యువరాణి షైకామహ్రా మొహమ్మద్ రషీద్ అల్ మక్తౌమ్ తీసుకున్న ఓ నిర్ణయం ప్రపంచవ్యాప్తంగా సంచలనమైంది. భర్త షేక్ మనాబిన్ మొహమ్మద్ బిన్ రషీద్ బిన్ మన్ అల్ మక్తౌమ్కు ఇన్స్టాగ్రామ్ ద్వారా విడాకులు ఇచ్చారు. రెండు నెలల క్రితమే ఈ దంపతులు తొలి బిడ్డకు జన్మనిచ్చారు. అంతలోనే యువరాణి ఈ నిర్ణయం తీసుకోవడం, పైగా దానిని సోషల్ మీడియా ద్వారా ప్రకటించడం చర్చనీయాంశమైంది. “డియర్ హజ్బండ్.. మీరు ఇతరుల సహచర్యాన్ని కోరుకోవడంతో నేను విడాకులు తీసుకోవాలని నిర్ణయించుకున్నా.
నేను మీకు విడాకులు ఇస్తున్నా.. నేను మీకు విడాకులు ఇస్తున్నా.. నేను మీకు విడాకులు ఇస్తున్నా. టేక్ కేర్. మీ మాజీ భార్య” అని షైకా ముమ్మారు తలాక్ చెబుతూ ఇన్స్టాలో పోస్టు చేశారు. ఆ వెంటనే ఈ వార్త వైరల్ అయింది. షేక్ మనాబిన్కు నిరుడు మేలోనే వివాహమైంది. రెండు నెలల క్రితమే ఓ పాపకు వీరు తల్లిదండ్రులయ్యారు. షైకా మహ్రా దుబాయ్ పాలకుడు, యూఏఈ ప్రధాని షేక్ మొహమ్మద్ బిన్ రషీద్ అల్ మక్తౌమ్ కుమార్తె.