బీజింగ్, జూలై 21: మైక్రోసాఫ్ట్ విండోస్లో తలెత్తిన సాంకేతిక సమస్య (క్రౌడ్ స్ట్రైక్) ప్రపంచ దేశాలను కుదిపేసినా.. చైనాపై ప్రభావం చూపించ లేదు. రెండు రోజుల క్రితం ‘క్రౌడ్ స్ట్రైక్’ కారణంగా ప్రపంచవ్యాప్తంగా 85 లక్షల కంప్యూటర్లలో సమస్య తలెత్తింది. కంప్యూటర్లలో బ్లూ స్క్రీన్ ఆఫ్ డెత్ ఎర్రర్ కనిపించటంతో.. సిస్టమ్స్ షట్డౌన్ అయ్యాయి. దీంతో వ్యాపార, వాణిజ్య సంస్థలు, విమాన సర్వీసులు, బ్యాంక్ సేవలు స్తంభించిపోయాయి. కానీ పొరుగు దేశం.. చైనాపై ప్రభావం పెద్దగా కనిపించలేదు. అక్కడి విమాన సర్వీసులు, బ్యాంకుల్లో సేవలు ఎప్పటిలాగే కొనసాగాయి. చైనాలో చాలా తక్కువ కంపెనీలు ‘క్రౌడ్ స్ట్రైక్’ను వినియోగించటం దీనికి కారణమని తెలుస్తున్నది. అంతేగాక గ్లోబల్ క్లౌడ్ సర్వీసులను ఆ దేశంలోని స్థానిక సంస్థలే నిర్వహించటమూ చైనాకు కలిసివచ్చింది. దీనికి తోడు సైబర్ ముప్పు, సాంకేతిక సమస్యలను ఎదుర్కొనేందుకు చైనా సొంతంగా ఏర్పాటుచేసుకున్న పటిష్ట సాంకేతిక వ్యవస్థ ముఖ్య కారణమని నిపుణులు చెబుతున్నారు.