జూలై 23: ఏడు నెలలుగా ఉపాధి కరువై.. అప్పులు భారమై ఓ నేత కార్మికుడు ఆత్మహత్య చేసుకున్నాడు. ఈ విషాదకర ఘటన జోగుళాంబ గద్వాల జిల్లాలో చోటుచేసుకున్నది. కుటుంబ సభ్యుల కథనం ప్రకా రం.. అయిజ పట్టణంలోని భరత్నగర్కు చెం దిన కాకె పరమేశ్(52) చేనేత మగ్గంపై చీరలు నేస్తూ జీవనం సాగించేవాడు. చిన్ననాటి నుంచే నేత వృత్తినే కొనసాగిస్తున్నాడు. 7 నెలలుగా చేనేత కార్మికులకు చేతినిండా పని లేకపోవడంతో కుటుంబం గడవడం గగనమైంది. నేసిన చీరలకు గిరా కీ లేక.. బట్టల దుకాణ యజమానుల నుంచి చీరలు నేసేందుకు ఆర్డర్లు రాకపోవడంతో అప్పులు చేయక తప్పలేదు. దీనికితోడు ఏడాది కిందట కూతురి వివాహం చేసి మరింత ఆర్థికంగా ఇబ్బందులకు గురయ్యాడు.
కల్యాణలక్ష్మి సా యానికి దరఖాస్తు చేసుకున్నా ఇంకా మంజూ రు కాలేదు. కుటుంబం గడవక.. అప్పులు తీర్చే మార్గంలేకపోగా సోమవా రం రాత్రి డబ్బుల కోసం భార్యాభర్తలు గొడవపడ్డారు. తీవ్ర మనోవేదనకు గురైన పరమేశ్ అర్ధరాత్రి మరో గదిలోకి వెళ్లి ఐరన్ పైపునకు ఉరేసుకొని ఆత్మహత్య చేసుకున్నాడు. అతడికి భార్య భారతి, కూతురు, కుమారుడు ఉన్నారు. కేసు నమోదు చేసి దర్యాప్తు చేస్తున్నట్టు ఎస్సై విజయ్ భాస్కర్ తెలిపారు. తమను ప్రభుత్వ పరంగా ఆదుకోవాలని బాధిత కుటుంబ సభ్యులు కోరారు. కాగా పరమేశ్ పదోతరగతి బ్యాచ్ మిత్రులు రూ.25 వేల ఆర్థిక సాయం అందజేశారు.