గాంధీనగర్ : గుజరాత్ మోర్బీ వంతెన కూలిన ఘటనపై ప్రభుత్వం స్థానిక మున్సిపాలిటీకి షోకాజ్ నోటీసులు జారీ చేసింది. మున్సిపల్ విధులను నిర్వర్తించడంలో విఫలమైనందున ఎందుకు రద్దు చేయకూడదో చెప్పాలంటూ నోటీసుల్లో ఆదేశించింది. గతేడాది అక్టోబర్ 30న మోర్బీలో మచ్చు నదిపై బ్రిటీష్ కాలం నాటికి చెందిన తీగల వంతెన కూలిపోయింది. ఈ ఘటనలో 47 మంది పిల్లలతో సహా దాదాపు 140 మందికిపైగా ప్రాణాలు కోల్పోయిన విషయం విధితమే. ఈ క్రమంలో రాష్ట్ర పట్టణాభివృద్ధి శాఖ తాజాగా నోటీసులు జారీ చేసింది.
ఈ నెల 25వ తేదీలోగా సాధారణ సభ తీర్మానం రూపంలో లిఖితపూర్వక వివరణను సమర్పించాలని మోర్బీ మున్సిపాలిటీని నోటీసుల్లో ఆదేశించింది. ఇంతకు ముందు హైకోర్టులో వాదనలు జరిగిన సమయంలో.. ప్రమాదం తీవ్రతను దృష్టిలో పెట్టుకున్న ప్రభుత్వం మున్సిపాలిటీని రద్దు చేయాలని నిర్ణయించింది. మోరీ వంతెన ఘటనను దృష్టిలో ఉంచుకొని హైకోర్టు రాష్ట్రం మొత్తంలో వంతెనలపై సర్వే నిర్వహించాలని భూపేంద్ర పటేల్ ప్రభుత్వాన్ని ఆదేశించింది. ఎన్ని సక్రమంగా ఉన్నాయో నివేదికను కోర్టు ముందుంచాలని ఆదేశించింది. ఇదే సమయంలో మృతులు, క్షతగాత్రుల కుటుంబానికి ఇచ్చే పరిహారం పెంచాలని హైకోర్టు సూచించింది.