న్యూఢిల్లీ, జనవరి 26: బ్యాంకింగ్ వ్యవస్థలో రుణాలు, డిపాజిట్ల మధ్య అంతరం అంతకంతకూ పెరిగిపోతున్నది. రుణ వితరణకు తగినట్టు డిపాజిట్లు వృద్ధిచెందడం లేదు. జనవరి తొలి పక్షం రోజుల్లో ఈ రెండింటి మధ్య గ్యాప్ 7.09 శాతానికి చేరిపోయింది. 2024 జనవరి 12నాటికి బ్యాంక్లు ఇచ్చే రుణాలు 19.93 శాతం పెరగ్గా, డిపాజిట్లు 12.84 శాతమే అధికంగా వచ్చినట్టు రిజర్వ్బ్యాంక్ తాజాగా విడుదల చేసిన రిపోర్ట్లో వెల్లడించింది. ఇదే 2023 సెప్టెంబర్ చివరి పక్షం రోజుల్లో రుణ వృద్ధి (19.42 శాతం), డిపాజిట్ వృద్ధి (12.94 శాతం) మధ్య గ్యాప్ 6.48 శాతంగా ఉన్నది. డిమాండ్ కారణంగా డిపాజిట్ల వృద్ధిని మించి రుణాలు పెరుగుతున్నాయని ఆర్బీఐ పేర్కొంది. స్వల్పకాలికంగా ఈ రెండింటి వృద్ధి మధ్య అంతరం ఏర్పడినా, దీర్ఘకాలంలో గ్యాప్ తొలగిపోతుందని తమ విశ్లేషణలో వెల్లడైనట్టు ఆర్బీఐ వివరించింది. ఇతర మదుపు సాధనాలైన డిబెంచర్లు, షేర్లు ప్రస్తుతం బ్యాంక్ డిపాజిట్లకంటే అధిక రాబడులు ఇస్తున్నందున, రుణ వృద్ధితో పోలిస్తే డిపాజిట్ల వృద్ధి వెనుకపడిందని మార్కెట్ నిపుణులు చెప్పారు.