Zika Virus | న్యూఢిల్లీ, జూలై 3: మహారాష్ట్రలోని కొన్ని ప్రాంతాల్లో జికా వైరస్ కేసులు నమోదుకావటంతో కేంద్రం ఆయా రాష్ర్టాలను అప్రమత్తం చేసింది. రాష్ట్ర ప్రభుత్వాలు నిరంతరం పరిస్థితిని పర్యవేక్షించాలని, ముఖ్యంగా గర్భిణులకు పరీక్షలు జరపటంపై దృష్టిసారించాలని కేంద్ర ఆరోగ్య శాఖ రాష్ర్టాలకు సూచించింది.
బుధవారం ఈ మేరకు అడ్వైజరీ జారీచేసింది. దోమల బెడద లేకుండా ప్రాంగణాలను పర్యవేక్షించడానికి, దోమల నివారణ చర్యలు చేపట్టేందుకు ఓ నోడల్ అధికారిని నియమించాలని సూచించింది. డెంగ్యూ, చికెన్గున్యా మాదిరి జికా వైరస్ కూడా ఏడిస్ రకం దోమల ద్వారా మనుషులకు సోకుతుంది. గర్భిణులకు ఈ వైరస్ సోకితే, వారికి పుట్టే పిల్లల్లో మెదడు ఎదుగుదల (మైక్రోసిఫాలే) దెబ్బతింటుంది. అంతేగాక బాధిత శిశువుల్లో నరాల సంబంధిత సమస్యలు తలెత్తుతాయి.