ముంబై: తమ పార్టీ పేరు, గుర్తును లాక్కోకపోతే మహారాష్ట్రలో 20-22 లోక్సభ సీట్లు గెలిచేవాళ్లమని శివసేన (యూబీటీ) నేత సంజయ్ రౌత్ (Sanjay Raut) అన్నారు. అక్టోబర్లో జరుగనున్న అసెంబ్లీ ఎన్నికల్లో వేరే పేరు, గుర్తుపై పోటీ చేయాలని సీఎం ఏక్నాథ్ షిండేను సవాల్ చేశారు. 2022లో ఏక్నాథ్ షిండే తిరుగుబాటు నేపథ్యంలో శివసేన రెండు వర్గాలుగా చీలిన సంగతి తెలిసిందే. అయితే ఉద్ధవ్ ఠాక్రే నేతృత్వంలోని శివసేన (యూబీటీ) 21 లోక్సభ స్థానాల్లో పోటీ చేయగా 9 సీట్లలో గెలిచింది. ఈ నేపథ్యంలో సంజయ్ రౌత్ దీని గురించి మాట్లాడారు. ‘అంతా మా నుంచి లాక్కున్నారు. పార్టీ పేరు, గుర్తు, మా ఎమ్మెల్యేలు, ఎంపీలు. అయినా పోరాటం చేసి తొమ్మిది మంది ఎంపీలను గెలిపించాం. మా పార్టీ పేరు, అసలు చిహ్నం ఉంటే 20-22 లోక్సభ స్థానాల్లో విజయం సాధించేవాళ్లం’ అని అన్నారు.
కాగా, జులై 12న మహారాష్ట్ర శాసనమండలికి జరిగే ద్వైవార్షిక ఎన్నికలపై స్టే విధించాలని కోరుతూ సుప్రీంకోర్టును ఆశ్రయిస్తామని సంజయ్ రౌత్ తెలిపారు. ఎన్నికల్లో ఓటు వేయనున్న అధికార సంకీర్ణ పార్టీలైన శివసేన, ఎన్సీపీ ఎమ్మెల్యేలపై అనర్హత వేటు పడే అవకాశం ఉందని అన్నారు. ఈ నేపథ్యంలో మండలి ఎన్నికలు రాజ్యాంగ విరుద్ధం, చట్టవిరుద్ధమని ఆయన విమర్శించారు.