కొల్లామ్: కేరళలోని కొల్లామ్కు చెందిన 64 ఏళ్ల మహిళ కల్లడ నదిలో కొట్టుకుపోయింది. నదిలో నీరు ఉదృతంగా ప్రవహిస్తుండగా ఆమె సుమారు పది కిలోమీటర్ల దూరం ఆ నీటిలో తేలుకుంటూ వెళ్లిపోయింది. నది ఒడ్డున బట్టలు జాడిస్తూ కాలు జరాడంతో శ్యామలమ్మ నదీ ప్రవాహంలో పడిపోయింది. అయితే ఇటీవల వర్షాలు కురుస్తున్న కారణంగా.. నదిలో నీరు తీవ్ర స్థాయిలో ప్రవాహిస్తున్నది. ఈత కొట్టడం తెలియని శ్యామలమ్మ.. నది నీటిలో పడిన తర్వాత ఆ ప్రవాహంలో కొట్టుకుపోయింది. నీరు వేగంగా ప్రవహిస్తుండడంతో.. తన ముఖాన్ని పైకి లేపి.. ఆ ప్రవాహంలోనే వెళ్లిపోయింది.
చెట్టియారజికత్త, జాకడావు, కున్నతూరు బ్రిడ్జ్లను దాటుకుంటూ ఆమె కొట్టుకుపోయింది. నీటిలో కొట్టుకుపోతున్న ఆమెను కున్నతూరు బ్రిడ్జ్ నుంచి కొందరు వీడియో కూడా తీశారు. కానీ ఆమె అప్పటికే మృతిచెంది ఉంటుందని అనుమానించారు. అయితే అదృష్టం కొద్దీ.. చేరుపొయక వద్ద ఉన్న మంగలసెరి ఘాట్లో ఉన్న నది పొదల్లో ఆమె చిక్కుకున్నది. ఓ తీగ చెట్టును పట్టుకుని మూలుగుతున్న ఆమె అరుపులను స్థానికులు విన్నారు. వెంటనే పోలీసులకు సమాచారం ఇచ్చారు.
పడవలో వెళ్లి ఆమెను రక్షించారు. కల్లడ నది రూట్లో ఉన్న ఉరులుమాల వద్ద ఉన్న చెట్ల తీగల్లో శ్యామలమ్మ ట్రాపైంది. ఆమెను వెంటనే ఆస్పత్రికి తీసుకెళ్లారు. అక్కడ ఆమెకు ప్రైమరీ వైద్య చికిత్స చేయించారు. ఆమెకు ఎటువంటి మేజర్ గాయం కాలేదని తేల్చారు.