చండీగఢ్: బైక్పై వచ్చిన ఇద్దరు వ్యక్తులు స్కూటీపై వెళ్తున్న మహిళ వెనుక నుంచి చాలా దగ్గరగా కాల్పులు జరిపారు. (Woman Shot) తీవ్రంగా గాయపడిన ఆ మహిళ ప్రైవేట్ ఆసుపత్రిలోని ఐసీయూలో చికిత్స పొందుతున్నది. ఆమెపై హత్యాయత్నానికి సంబంధించి న్యాయవాదితో సహా నలుగురు వ్యక్తులను పోలీసులు అరెస్ట్ చేశారు. దేశ రాజధాని ఢిల్లీ శివారు ప్రాంతమైన హర్యానాలోని గురుగ్రామ్లో ఈ సంఘటన జరిగింది. బ్యూటీ పార్లర్ నిర్వహిస్తున్న పల్లవి శర్మ తన పిల్లలతో కలిసి ఒక అపార్ట్మెంట్లో నివసిస్తున్నది. శుక్రవారం రాత్రి 9.30 గంటల సమయంలో పని నిమిత్తం ద్వారకా ఎక్స్ప్రెస్వేలో స్కూటీపై వెళ్లింది. ఇద్దరు వ్యక్తులు బైక్పై ఆమెను అనుసరించారు. వెనుక నుంచి చాలా దగ్గరగా గన్తో కాల్పులు జరిపి పారిపోయారు.
కాగా, బుల్లెట్ గాయాల వల్ల పల్లవి శర్మ రోడ్డుపై పడిపోయింది. గమనించిన కొందరు వాహనదారులు ఆమెను వెంటనే సమీపంలోని ప్రైవేట్ ఆసుపత్రికి తరలించారు. పోలీసులకు సమాచారం ఇవ్వడంతో వారు సంఘటనా స్థలానికి చేరుకున్నారు. ఫోరెన్సిక్ టీంతో కలిసి కాల్పులకు సంబంధించిన ఆధారాలు సేకరించారు. పల్లవి హత్యాయత్నానికి సంబంధించి న్యాయవాది నితీష్ భరద్వాజ్, బీహార్కు చెందిన గుల్షన్ ఠాకూర్, మధ్యప్రదేశ్కు చెందిన రాజా, హర్యానాలోని నుహ్కు చెందిన బంటీని పోలీసులు అరెస్ట్ చేశారు.
మరోవైపు న్యాయవాది నితీష్ భరద్వాజ్ను పోలీసులు ప్రశ్నించగా పల్లవిని హత్య చేసేందుకు కుట్ర పన్నిన్నట్లు ఒప్పుకున్నాడు. భర్త నుంచి విడిపోయి విడిగా నివసిస్తున్న ఆమె ఒక కేసు నిమిత్తం తనను సంప్రదించినట్లు తెలిపాడు. తమ మధ్య పరిచయం స్నేహంగా మారిందని చెప్పాడు. దీంతో పల్లవిని వదిలించుకునేందుకు హత్య కోసం గుల్షన్ను కలిసినట్లు తెలిపాడు. అతడి అనుచరులైన రాజా, బంటీలు బైక్పై పల్లవిని అనుసరించి ఆమెపై కాల్పులు జరిపినట్లు పోలీసులకు చెప్పాడు. దీంతో అరెస్ట్ చేసిన నలుగురిపై పలు సెక్షన్ల కింద కేసు నమోదు చేసి దర్యాప్తు చేస్తున్నారు.