మెయిన్పురి: ఉత్తరప్రదేశ్లోని మెయిన్పురిలో షాకింగ్ ఘటన వెలుగులోకి వచ్చింది. ఫోన్ తీసుకున్నాడని భర్తకు కరెంట్ షాక్ (Electric Shock) పెట్టి చిత్ర హింసలకు గురిచేసిందో మహిళ. మెయిన్పురికి చెందిన బేబీ యాదవ్, ప్రదీప్ సింగ్ భార్యా భర్తలు. వారికి 14 ఏండ్ల కుమారుడు ఉన్నాడు. కాగా, బేబీ యాదవ్ గత కొంత కాలంగా ఫోన్తో ఎక్కువ కాలం గడుపుతున్నది, ఓ వ్యక్తితో గంటల తరబడి మాట్లాడుతున్నది. దీంతో ఆమెను అతడు హెచ్చరించాడు. అయినా వినకపోవడంతో ఆమె తల్లిదండ్రులకు విషయం చెప్పాడు. ఈ నేపథ్యంలో ఆమె నుంచి ఫోన్ తీసుకోవాలని వారు సలహా ఇచ్చారు.
అత్తవారింటి సూచన మేరకు ఆమె ఫోన్ను తీసుకున్నాడు. దీంతో ప్రదీప్ సింగ్పై ఆగ్రహంతో ఉన్న ఆమె.. అదను చూసి గతవారం అతనికి మత్తుమందు ఇచ్చింది. అనంతరం మంచానికి కట్టేసి విచక్షణా రహితంగా కొట్టింది. అంతటితో ఆగకుండా పలుమార్లు కరెంట్ షాక్ పెట్టింది. అడ్డుకోబోయిన తన కుమారుడిపై కూడా దాడి చేసింది. అయితే ఎలాగోలా అమె నుంచి తప్పించుకున్న ప్రదీప్.. పోలీసులకు ఫిర్యాదు చేశాడు. దీంతో ఆమెపై హత్యాయత్నం సహా వివిధ సెక్షన్ల కింద కేసు నమోదుచేశారు. ప్రస్తుతం ఆమెకోసం గాలిస్తున్నామని అధికారులు చెప్పారు.