న్యూఢిల్లీ, జూన్ 10: కేంద్రంలో 72 మంది మంత్రులతో కొత్త ప్రభుత్వం కొలువుదీరింది. ఇక కీలకమైన లోక్సభ స్పీకర్ ఎన్నిక జరుగాల్సి ఉన్నది. లోక్సభ ఎన్నికల్లో బీజేపీ ఈసారి సొంతంగా మెజార్టీ సాధించలేకపోయిన విషయం తెలిసిందే. ఈ నేపథ్యంలో ఈసారి స్పీకర్ పోస్టుపై ఎన్డీయే కూటమి ప్రభుత్వంలో కింగ్ మేకర్లుగా మారిన టీడీపీ, జేడీయూ కన్నేశాయి. బీజేపీ తమపై ఆధారపడాల్సిన పరిస్థితి నెలకొన్న నేపథ్యంలో స్పీకర్ పోస్టును దక్కించుకోవాలని ఈ రెండు పార్టీలు ప్రయత్నిస్తున్నట్టు సమాచారం. గత రెండు పర్యాయాలు బీజేపీ ఎంపీనే స్పీకర్ అయిన విషయం తెలిసిందే. 2014-19 మధ్య సుమిత్రా మహాజన్, 2019-24 మధ్య ఓంబిర్లా సభాపతులుగా పనిచేశారు.
లోక్సభ స్పీకర్కు సభ నిర్వహణ, ఇతర అంశాల్లో పలు అధికారాలు ఉంటాయి. నేటి రాజకీయ పరిస్థితుల్లో ఈ పోస్టు చాలా కీలకంగా మారింది. పార్టీ ఫిరాయింపుల సమయంలో సభ్యుడిపై అనర్హత వేటు విషయంపై స్పీకరే నిర్ణయం తీసుకోవాల్సి ఉంటుంది. మరోవైపు ప్రభుత్వంపై అవిశ్వాస తీర్మానం, సభలో కీలక బిల్లుల గట్టెక్కడం, సభలో సభ్యులు మాట్లాడే అవకాశం వంటి విషయాల్లో స్పీకర్ది కీలక పాత్ర అవుతుంది.