Artificial Intelligence | న్యూఢిల్లీ, జూన్ 3: కృత్రిమ మేధ.. ప్రపంచవ్యాప్తంగా అన్ని రంగాలకు వేగంగా విస్తరిస్తున్న అత్యాధునిక సాంకేతికత. ఇది భవిష్యత్తులో లక్షలాది ఉద్యోగులకు ఎసరు పెడుతుందని, రానున్న దశాబ్ద కాలంలో జాబ్ మార్కెట్లో కీలక మార్పులకు కారణం కానున్నదనే వాదనలు వినిపిస్తున్నాయి. ఏఐ కొన్ని రంగాలకు అభివృద్ధి పరంగా దోహదం చేయనుండగా.. మరికొన్ని రంగాల ఉద్యోగాలపై ప్రభావం చూపే అవకాశం కనిపిస్తున్నది. ఏఐతో 2030 నాటికి ప్రపంచవ్యాప్తంగా దాదాపు 1.2 కోట్ల మంది ఉద్యోగపరమైన మార్పులు ఎదుర్కోవాల్సి వస్తుందని, వాళ్లంతా కొత్త ఉద్యోగాలను వెతుక్కోవాల్సి ఉంటుందని మెకన్సీ తాజా నివేదిక వెల్లడించింది. కరోనా మహమ్మారి వ్యాప్తి సమయంలో చోటుచేసుకొన్న ఉద్యోగ మార్పుల వేగంతో ఇది జరుగనున్నదని అభిప్రాయపడింది. మెకన్సీ సీనియర్ పార్ట్నర్, సంస్థ గ్లోబల్ ఇన్స్టిట్యూట్ డైరెక్టర్ క్వేలిన్ ఎల్లింగ్రూడ్ ఈ వివరాలను ఇటీవల నిర్వహించిన మీడియా సమావేశంలో పేర్కొన్నారు.
ఆయా రంగాల్లోని చాలా ఉద్యోగ పాత్రల్లో రిపీటెడ్ టాస్క్లు, డాటా సేకరణ, డాటా ప్రాసెసింగ్ వంటివి ఉంటాయని ఎల్లింగ్రూడ్ పేర్కొన్నారు. ఆటోమేషన్ కోసం ఈ విధులు చాలా ముఖ్యమని, వీటిని ఏఐ సమర్థవంతంగా నిర్వహించగలదని ఆయన అభిప్రాయపడ్డారు. ఏఐ రంగ ప్రవేశం నేపథ్యంలో డిమాండ్ తగ్గుతున్న క్రమంలో 2030 నాటికి దాదాపు 1.18 కోట్ల మంది ఉద్యోగులు, కార్మికులు తాము ఉన్న ఉద్యోగాల నుంచి కొత్త ఉద్యోగ మార్గంలోకి మారాల్సి ఉంటుందని ఎల్లింగ్రూడ్ సహ రచయితగా ఉన్న మెకన్సీ నివేదిక వెల్లడించింది.
భవిష్యత్తులో కృత్రిమ మేథ, ఆటోమేషన్ను విస్తృతంగా అందిపుచ్చుకోవడం వల్ల ప్రస్తుతం ఉన్న అనేక ఉద్యోగాల్లోని 30 శాతం టాస్క్లపై ప్రభావం పడుతుందని నివేదిక పేర్కొన్నది. దీని బట్టి ప్రతి ఒక్కరూ కొత్త సాంకేతికతలకు అనుగుణంగా తమ పని విధానాలను మార్చుకోవాల్సి ఉంటుంది. మార్పులకు అనుగుణంగా ఉద్యోగులు క్రియాశీలంగా వ్యహరించాల్సిన అవసరం ఉన్నదని ఎల్లింగ్రూడ్ స్పష్టం చేశారు. జాబ్ మార్కెట్లో మార్పులను తెలుసుకోవడం, ఆటోమేషన్కు తక్కువ అవకాశం ఉన్న నైపుణ్యాలను అభివృద్ధి చేసుకోవడం ముఖ్యమని పేర్కొన్నారు.
ఏఐతో వృద్ధి చెందే రంగాలు- హెల్త్కేర్, స్టెమ్ (సైన్స్, టెక్నాలజీ, ఇంజినీరింగ్, మ్యాథమాటిక్స్).
ఈ రంగాల జాబ్లపై ప్రభావం- అడ్మినిస్ట్రేషన్, కస్టమర్ సర్వీస్ అండ్ సేల్స్, ఫుడ్ సర్వీస్, ప్రొడక్షన్ అండ్ మాన్యుఫ్యాక్చరింగ్