BJP | న్యూఢిల్లీ: ప్రధాని మోదీ సహా, బీజేపీ నేతలు ఎన్నికల ప్రచారంలో పదేపదే మతపరమైన అంశాలను మాట్లాడుతున్నా చర్యలు తీసుకోవడంలో ఎన్నికల కమిషన్ విఫలమవుతున్నదని ఇండిపెండెంట్ ప్యానెల్ ఫర్ మానిటరింగ్ ఎలక్షన్స్ పేర్కొన్నది. లోక్సభ ఎన్నికల ప్రక్రియపై ఈ ప్యానెల్ ఏడో వారం పర్యవేక్షణ నివేదికను వెల్లడించింది. మోదీ మొత్తం ముస్లిం సమాజానికి వ్యతిరేకంగా మాట్లాడుతున్నారని, వారసత్వ పన్ను, రిజర్వేషన్లపై అబద్ధాలు చెప్తున్నారని, రామరాజ్యం, ఓట్ జిహాద్ అని ప్రస్తావిస్తున్నారని పేర్కొన్నది. అయినప్పటికీ ప్రధాని ప్రసంగాలపై ఈసీ చర్యలు తీసుకోలేదని తెలిపింది.
బీజేపీ ఎంపీ అర్వింద్ ముస్లింలపై విద్వేషపు వీడియోను ‘ఎక్స్’లో షేర్ చేశారని, మరో అభ్యర్థి నవ్నీత్ రాముడి పేరుతో ఓట్లు అడిగారని పేర్కొన్నది. సూరత్, ఇండోర్లో బలవంతంగా ప్రతిపక్ష అభ్యర్థులను నామినేషన్ ఉపసంహరించుకునేలా చేశారని, గాంధీనగర్లోనూ ఒత్తిడి చేశారని పేర్కొన్నది. పోలింగ్ శాతాన్ని వెల్లడించడంలో ఈసీ ఆలస్యం చేస్తున్నదని తెలిపింది. ఎన్నికల పరిశీలనకు వచ్చిన విదేశీ ఎన్నికల సంస్థలు, రాజకీయ పార్టీలను కలవడానికి దేశంలోని పౌర సంస్థలకు ఈసీ అనుమతి ఇవ్వడం లేదని ఆరోపించింది.