చెన్నై: తమిళ సినీ నటుడు విజయ్ ఏర్పాటు చేసిన రాజకీయ పార్టీ తమిళగ వేట్రి కళగం (టీవీకే) జెండాను గురువారం ఆవిష్కరించారు. పనైయూర్లోని పార్టీ కార్యాలయంలో ఈ కార్యక్రమం జరిగింది. జెండా పైన, కింద జేగురు (మెరూన్) రంగు, మధ్యలో పసుపు రంగు ఉన్నాయి. మధ్యలో రెండు ఏనుగులు, వాటి మధ్యలో వాగాయ్ పువ్వు ఉంది. వాగాయ్ అంటే తమిళంలో విజయం అని అర్థం.
విజయ్ మాట్లాడుతూ, టీవీకే పార్టీ జెండా వెనుక చారిత్రక ప్రాధాన్యం ఉందని, రాష్ట్ర స్థాయి సమావేశంలో దాని గురించి వివరిస్తానని చెప్పారు. తాను దీనిని జెండాగా భావించడం లేదని, తమిళనాడు భావి తరాల విజయకేతనంగా భావిస్తున్నానని తెలిపారు. విజయ్ పార్టీతో తమిళ రాజకీయాల్లో నూతన అధ్యాయం ప్రారంభమైంది. రాష్ట్రంలో అసెంబ్లీ ఎన్నికలు 2026లో జరుగుతాయి.