Depression | న్యూఢిల్లీ : మీరు మానసిక ఒత్తిడితో బాధ పడుతున్నారా? అయితే ఏవైనా సువాసనలు పీల్చండి! సువాసనలను పీల్చడం ద్వారా ఒత్తిడి నుంచి ఉపశమనం పొందవచ్చునని యూనివర్సిటీ ఆఫ్ పిట్స్బర్గ్ స్కూల్ ఆఫ్ మెడిసిన్ పరిశోధకులు, యూపీఎంసీ సోషల్ వర్కర్స్ నిర్వహించిన అధ్యయనంలో వెల్లడైంది. జీవితంలో గతంలో జరిగిన సంఘటనలను గుర్తు చేసుకోవడానికి మాటల కన్నా సువాసనలే ఎక్కువ ప్రయోజనకరమని తెలిసింది.
ప్రతికూల ఆలోచనల పరంపరను అడ్డుకుని, ఆలోచనా సరళిని తిరిగి సరైన దారిలో పెట్టడానికి, బాధితుడు వేగంగా కోలుకోవడానికి ఈ ప్రక్రియ దోహదపడుతుందని పరిశోధకులు చెప్పారు. ఈ అధ్యయనంలో పాల్గొన్న వారికి విక్స్ వేపొరబ్, కాఫీ, కొబ్బరి నూనె, ఆవ పొడి, రెడ్ వైన్, వనిల్లా ఎక్స్ట్రాక్ట్, లవంగాలు, షూ పాలిష్, నారింజ పండ్లు, వంట నూనెలు, కెచప్ వంటివాటిని వాసన చూపించి, గతంలో వారి జీవితాల్లో జరిగిన సంఘటనలను గుర్తు చేసుకోమని చెప్పామని పరిశోధకులు తెలిపారు.
మాటల ద్వారా ప్రోత్సహించినప్పటి కన్నా, సువాసనల ద్వారా ప్రోత్సహించినపుడు మరింత తేలికగా వీరు గత జ్ఞాపకాలను గుర్తు తెచ్చుకోగలిగారని చెప్పారు. వాసన చూసినపుడు వీరికి గత జ్ఞాపకాలు చాలా వివరంగా గుర్తుకు వచ్చాయని, వాటిలో వారు నిమగ్నమైపోయారని తెలిపారు. మరొక విశేషం ఏమిటంటే, పాజిటివ్ మెమరీస్ను గుర్తు చేసుకోవాలని ప్రత్యేకంగా చెప్పకపోయినప్పటికీ, వాసనలు చూసిన తర్వాత వీరు పాజిటివ్ మెమరీస్నే ఎక్కువగా గుర్తు చేసుకున్నారని చెప్పారు.