న్యూఢిల్లీ : మహదేవ్ ఆన్లైన్ బెట్టింగ్ కేసును విచారిస్తున్న ఈడీ సంచలన విషయాలు వెల్లడించింది. దుబాయ్లో ఈ ఏడాది ఫిబ్రవరిలో జరిగిన కంపెనీ ప్రమోటర్ సౌరభ్ చంద్రార్కర్ వివాహ వేడుకకు పలువురు బాలీవుడ్ స్టార్లు, సింగర్లు హాజరైనట్టు తెలిపింది. టైగర్ ష్రాఫ్, సన్నీ లియోన్ వంటి బాలీవుడ్ సెలబ్రిటీలు ఈ వేడుకకు హాజరవగా నేహ కక్కర్ సహా పలువురు సింగర్స్ ఈ వేడుకలో పెర్ఫామ్ చేశారు.
వివాహ వేడుకకు అతీఫ్ అస్లాం, రహత్ ఫతే అలి ఖాన్, అలీ అస్ఘర్, విశాల్ దడ్లానీ, ఎలీ అవిరామ్, భారతి సింగ్, భాగ్యశ్రీ, కృతి కర్బందా, నుష్రత్ బరూచా, కృష్ణ అభిషేక్ వంటి సెలబ్రిటీలు హాజరయ్యారు. ఈ వేడుకకు హాజరైన సెలబ్రిటీలకు ముంబైకి చెందిన ఓ ఈవెంట్ కంపెనీ పెద్దమొత్తంలో చెల్లింపులు జరిపినట్టు దర్యాప్తు సంస్ధ వర్గాలు వెల్లడించాయి.
చంద్రార్కర్ పెండ్లి వేడుకకు మహదేవ్ యాప్ ప్రమోటర్లు ఏకంగా రూ. 200 కోట్ల నగదు ఖర్చుచేశారని అధికారులు పేర్కొన్నారు. కుటుంబసభ్యులను నాగపూర్ నుంచి దుబాయ్కు తరలించేందుకు ప్రైవేట్ జెట్స్ను బుక్ చేశారు. ఈవెంట్ మేనేజ్మెంట్ కంపెనీకి రూ. 112 కోట్లు హవాలా మార్గం ద్వారా తరలించారని ఈడీ డిజిటల్ ఎవిడెన్స్ను సేకరించింది. ఇక హోటల్ బుకింగ్స్ కోసం రూ. 42 కోట్లను నగదు రూపంలో కంపెనీ చెల్లించింది. మహదేవ్ ఆన్లైన్ బెట్టింగ్ కేసులో ఈడీ రూ. 417 కోట్ల విలువైన ఆస్తులను అటాచ్ చేసింది.
Read More :
Crime news | నిలోఫర్ ఆస్పత్రిలో దారుణం.. ఆరు నెలల చిన్నారిని ఎత్తుకెళ్లిన దుండగులు