Yogi Adityanath | లక్నో, జూన్ 8: బీజేపీకి కంచుకోటగా భావించిన ఉత్తరప్రదేశ్లో ఈసారి భారీ ఎదురుదెబ్బ తగిలింది. కమలం పార్టీకి ఎదురులేదనుకున్న రాష్ట్రంలో పరాభవం ఎదురైంది. ఆ పార్టీ దాదాపు సగం స్థానాలను కోల్పోయింది. ఎన్నికల్లో బీజేపీ ఒంటరిగా మ్యాజిక్ ఫిగర్ అందుకోకపోవడానికి కూడా యూపీలో ప్రతికూల ఫలితాలే ప్రధాన కారణం. ఈ నేపథ్యంలో ఈ వైఫల్యానికి ఉత్తరప్రదేశ్ ముఖ్యమంత్రి యోగి ఆధిత్యనాథ్ను బాధ్యుడిని చేయవచ్చనే అనుమానాలను రాజకీయ విశ్లేషకులు వ్యక్తం చేస్తున్నారు. యూపీ ఫలితాలను సాకుగా చూపి భవిష్యత్తు ప్రధానిగా బీజేపీ శ్రేణులు భావించే యోగి ఆధిత్యనాథ్కు ఎసరు పెట్టవచ్చని అంటున్నారు. తాజాగా జరుగుతున్న పరిణామాలు ఈ అనుమానాలకు బలం చేకూరుస్తున్నాయి. ముఖ్య ంగా మహారాష్ట్రలో దేవేంద్ర ఫడ్నవీస్ రాజీనామా ప్రకటన యోగి ఆధిత్యనాథ్కు చెక్ పెట్టేందుకేననే వాదనలు వినిపిస్తున్నాయి.
లోక్సభ ఎన్నికల ఫలితాలు వచ్చే వరకు యూపీలో బీజేపీకి ఎదురు లేదని అంతా భావించారు. ఎగ్జిట్ పోల్స్ కూడా ఇదే చెప్పాయి. అయితే, ప్రజాతీర్పు మాత్రం అందరినీ ఆశ్చర్య పరిచింది. 2019లో 62 స్థానాలు సాధించిన బీజేపీ ఇప్పుడు కేవలం 33 స్థానాలకే పరిమితమైంది. 2019లో 49.6 శాతం ఓట్లు సాధించిన బీజేపీ ఈసారి 41.4 శాతానికి పడిపోయింది. ఈసారి బీజేపీ 49 మంది సిట్టింగ్లకు టికెట్లు ఇవ్వగా 27 మంది ఓడిపోయారు. కేంద్రమంత్రులు స్మృతి ఇరానీ(అమేథీ), అజయ్ మిశ్రా(ఖేరి), మహేంద్రనాథ్ పాండే(చందౌలి), ఎనిమిదిసార్లు ఎంపీగా పనిచేసిన మేనకా గాంధీ(సుల్తాన్పూర్), మాజీ ముఖ్యమంత్రి కల్యాణ్ సింగ్ కుమారుడు రాజ్వీర్ సింగ్(ఎటా) తదితర ప్రముఖ బీజేపీ నేతలు ఓడిపోయారు.
ఉత్తరప్రదేశ్లో బీజేపీ వైఫల్యానికి కారణాలేంటి ? బాధ్యులు ఎవరు ? అనే అంశం ఇప్పుడు చర్చనీయాంశమైంది. ఉత్తరప్రదేశ్ చుట్టూ ఉన్న ఉత్తరాఖండ్, మధ్యప్రదేశ్, ఛత్తీస్గఢ్, హిమాచల్ ప్రదేశ్, ఢిల్లీ, బీహార్, జార్ఖండ్లో మంచి ఫలితాలు సాధించిన బీజేపీ యూపీలో మాత్రం ప్రతికూల ఫలితాలు సాధించడానికి రాష్ట్ర ప్రభుత్వ తప్పిదాలే కారణమనే వాదన తెర మీదకు వచ్చింది. యూపీలో వరుసగా జరిగిన ప్రశ్నా పత్రాల లీకేజీలు, ప్రభుత్వ ఉద్యోగాల నియామక పరీక్షల వాయిదాలు, పెరిగిపోయిన నిరుద్యోగం, వంటి అంశాలు ఎన్నికల్లో బీజేపీకి నష్టం చేశాయనే విశ్లేషణలు ఉన్నాయి. వీటన్నింటికీ ముఖ్యమంత్రి యోగిని బాధ్యుడిని చేసే ప్రయత్నాలు జరుగుతున్నాయనే భావన వ్యక్తం అవుతున్నది. అయితే, యోగీ వర్గీయులు మాత్రం అభ్యర్థుల ఎంపికలో కేంద్ర నాయకత్వం తప్పిదమే ఈ ఫలితాలకు కారణమని అంటున్నారు.
ఫడ్నవీస్ రాజీనామా వెనుక
యూపీలో ఓటమిని యోగిపైకి నెట్టేసే ప్రయత్నాలు జరుగుతున్నట్టు కనిపిస్తున్న నేపథ్యంలో ఎన్నికల ముందు ఢిల్లీ సీఎం అరవింద్ కేజ్రీవాల్ చేసిన వ్యాఖ్యలు తెరపైకి వచ్చాయి. బీజేపీ మూడోసారి కేంద్రంలో అధికారంలోకి వస్తే యోగిని ముఖ్యమంత్రి పదవి నుంచి తప్పిస్తారని ఆయన ఆరోపించారు. మోదీ రిటైరైతే ప్రధాని పదవికి అమిత్ షాకు పోటీ ఉండకుండా చూసుకునేందుకు యోగిని పక్కనపెడతారని ఆయన అప్పుడు జోస్యం చెప్పారు. ఇప్పుడు జరుగుతున్న పరిణామాలు ఈ దిశగానే ఉన్నాయనే భావన వ్యక్తమవుతున్నది.
ముఖ్యంగా మహారాష్ట్ర ఉప ముఖ్యమంత్రి దేవేంద్ర ఫడ్నవీస్ రాజీనామా ప్రకటన వెనుక వ్యూహం ఉందనే వాదన తెరమీదకు వచ్చింది. మహారాష్ట్రలో బీజేపీ వైఫల్యానికి బాధ్యత వహిస్తూ తాను పదవికి రాజీనామా చేస్తానని ఫడ్నవీస్ ప్రకటించారు. అయితే, యోగి ఆధిత్యనాథ్ కూడా రాజీనామా చేసేలా ఒత్తిడి తెచ్చే వ్యూహంతోనే ఫడ్నవీస్ ఈ ప్రకటన చేశారని శివసేన(ఉద్ధవ్) నేత సంజయ్ రౌత్ వ్యాఖ్యానించడం చర్చనీయాంశమైంది. యూపీలో 2027లో అసెంబ్లీ ఎన్నికలు జరగాల్సి ఉంది. ఆ ఎన్నికలకు బీజేపీ కచ్చితంగా యోగి సారథ్యంలోనే వెళ్తుందని చెప్పలేమని రాజకీయ విశ్లేషకులు అభిప్రాయపడుతున్నారు.