న్యూఢిల్లీ, జూలై 23: దేశవ్యాప్తంగా సంచలనం సృష్టించిన నీట్ లీకేజీ కేసులో సుప్రీంకోర్టు మంగళవారం కీలక తీర్పు వెలువరించింది. నీట్ యూజీ పరీక్షను మరోసారి నిర్వహించాల్సిన అవసరం లేదని స్పష్టం చేసింది. దేశవ్యాప్తంగా ప్రశ్నాపత్రం లీకైందని చెప్పేందుకు తగిన ఆధారాలు లేవని సీజేఐ జస్టిస్ డీవై చంద్రచూడ్ నేతృత్వంలోని ధర్మాసనం ఈ సందర్భంగా స్పష్టం చేసింది. పాట్నా, హజారీబాగ్లలో మాత్రమే పేపర్ లీక్ అయిందని పేర్కొన్నది. నీట్ పరీక్షను మళ్లీ నిర్వహించాలని ఆదేశిస్తే, గతంలో పరీక్ష రాసిన దాదాపు 24 లక్షల మంది అభ్యర్థులపై ప్రభావం చూపుతుందని అభిప్రాయపడింది. ఈ మేరకు మే 5న నిర్వహించిన నీట్ యూజీ-2024 పరీక్షను రద్దు చేయాలని, మరోసారి పరీక్ష నిర్వహించాలని కోరుతూ దాఖలైన పిటిషన్లను జస్టిస్ డీవై చంద్రచూడ్, జస్టిస్ జేడీ పార్థివాలా, జస్టిస్ మనోజ్ మిశ్రాలతో కూడిన త్రిసభ్య ధర్మాసనం కొట్టివేసింది.
నేషనల్ టెస్టింగ్ ఏజెన్సీ(ఎన్టీఏ) సమర్పించిన డాటా, ఐఐటీ మద్రాస్ ఇచ్చిన నివేదికను కోర్టు క్షుణ్ణంగా పరిశీలించిందని, దేశవ్యాప్తంగా పెద్దయెత్తున పేపర్ లీకేజీ జరిగిందనే దానికి ఆధారాలు కనిపించలేదని సీజేఐ జస్టిస్ చంద్రచూడ్ అన్నారు. ‘ నీట్ పరీక్ష ఫలితం దెబ్బతిన్నట్టు లేదా పరీక్ష సమగ్రత దెబ్బతిన్నట్టు ఒక నిర్ణయానికి వచ్చేందుకు తగిన ఆధారాలు లేవు’ అని పేర్కొన్నారు. ప్రస్తుత విద్యా సంవత్సరానికి సంబంధించి మళ్లీ నిర్వహించడం వల్ల అడ్మిషన్ షెడ్యూల్కు అంతరాయం కలుగుతుందని, వైద్య విద్య కోర్సులపై ప్రభావం పడుతుందని, భవిష్యత్తులో క్వాలిఫైడ్ మెడికల్ నిపుణుల అందుబాటును దెబ్బతీస్తుందని, బలహీనవర్గాలకు చెందిన విద్యార్థులకు నష్టం చేకూరుస్తుందని కోర్టు అభిప్రాయపడింది.
పాట్నా, హజారీబాగ్లలో మాత్రమే నీట్ పేపర్ లీకైందన్న విషయంలో ఎలాంటి వివాదం లేదని, ఆయా కేంద్రాల్లో పరీక్ష రాసిన 155 మంది విద్యార్థులు ప్రశ్నాపత్రం లీకేజీ నుంచి ప్రత్యక్షంగా లబ్ధి పొందారని సుప్రీంకోర్టు తెలిపింది. ఈ మేరకు సీబీఐ నివేదికను ప్రస్తావించింది. పేపర్ లీక్లో ఎక్కువ సంఖ్యలో లబ్ధిదారుల ప్రమేయం ఉన్నట్టు సీబీఐ దర్యాప్తులో తేలితే, వారిపై చర్యలు తీసుకుంటామని న్యాయస్థానం ఈ సందర్భంగా స్పష్టం చేసింది. నీట్ పరీక్షలో వివాదాస్పదమైన ప్రశ్నకు సంబంధించి ‘ఆప్షన్ 4’ సరైనదని ఐఐటీ ఢిల్లీ నివేదిక ఇచ్చిన నేపథ్యంలో.. అందుకు అనుగుణంగా ఫలితాలను సవరించాలని సీజేఐ ఎన్టీఏను ఆదేశించారు.
నీట్ యూజీ-2024 పరీక్షలో అడిగిన ఒక వివాదాస్పద ఫిజిక్స్ ప్రశ్నకు సరైన సమాధానంపై ఢిల్లీ ఐఐటీ నిపుణుల కమిటీ మంగళవారం సుప్రీంకోర్టుకు నివేదిక సమర్పించింది. ఆ ప్రశ్నకు సరైన సమాధానం ఒక్కటేనని స్పష్టం చేసింది. సంబంధిత ప్రశ్నకు ఇచ్చిన ఆప్షన్లలో నాలుగోది మాత్రమే సరైన సమాధానం అని ముగ్గురు నిపుణులతో కూడిన కమిటీ తేల్చిందని ధర్మాసనం తెలిపింది. ‘స్టేట్మెంట్ 1 కరెక్ట్.. స్టేట్మెంట్ 2 కరెక్ట్ కాదు’ అని ఆ నాలుగో ఆప్షన్ చెబుతున్నదని పేర్కొన్నది. నేషనల్ టెస్టింగ్ ఏజెన్సీ కూడా 4వ ఆప్షన్నే సరైన సమాధానంగా ఆన్సర్ కీలో సవరించాలని తెలిపింది. ప్రశ్న నంబర్ 29కు నాలుగో ఆప్షన్ మాత్రమే సరైన సమాధానమని తేల్చిన నేపథ్యంలో నాలుగు లక్షల మందికి పైగా అభ్యర్థులు నాలుగు మార్కులు కోల్పోనున్నారు.
న్యూఢిల్లీ, జూలై 23: నీట్ పిటిషన్లపై సుప్రీంకోర్టులో విచారణ సందర్భంగా సీజేఐ జస్టిస్ చంద్రచూడ్, న్యాయవాది మాథ్యూస్ నెడుంపర మధ్య మాటల యుద్ధం నడిచింది. చివరకు ‘సెక్యూరిటీని పిలవండి.. ఆయన్ను బయటకు పంపండి’ అని సీజేఐ అనేంత వరకు ఈ వివాదం వెళ్లింది. నీట్ పిటిషన్దారుల్లో ఒకరి తరపు న్యాయవాది నరేందర్ హూడా వాదనలు వినిపిస్తున్న క్రమంలో తాను మాట్లాడుతానంటూ మధ్యలో కలుగజేసుకొన్న లాయర్ మాథ్యూస్పై సీజేఐ తీవ్ర ఆగ్రహం వ్యక్తం చేశారు. ‘ఈ కోర్టులో నేను ఒక సీనియర్ న్యాయవాదిని. మాట్లాడేందుకు నాకు అన్ని హక్కులు ఉన్నాయి’ అని సమాధానం ఇచ్చారు. దీనిపై కోపగించుకొన్న సీజేఐ ‘నేను మిమ్మల్ని హెచ్చరిస్తున్నాను. మీరు గ్యాలెరీ చూసి మాట్లాడకూడదు. నేను ఈ కోర్టు ఇన్చార్జిని. సెక్యూరిటీని పిలవండి.. ఆయన్ను బయటకు పంపండి’ అంటూ ఆగ్రహం వ్యక్తం చేశారు. అక్కడి నుంచి వెళ్లిపోయిన ఆయన మళ్లీ కోర్టు రూమ్లోకి వచ్చి ‘సారీ, నేను ఏ తప్పు చేయలేదు. నా పట్ల అనుచితంగా ప్రవర్తించారు’ అని అన్నారు. తనను అవమానించినందుకు సీజేఐను క్షమిస్తున్నానని బైబిల్లోని ఒక వాక్యాన్ని చదివారు.
మాథ్యూస్ నెడుంపర సుప్రీంకోర్టులో సీజేఐ చంద్రచూడ్తో వాగ్వాదానికి దిగడం ఇదే తొలిసారి కాదు. ఈ ఏడాది మార్చిలోనూ ఎలక్టోరల్ బాండ్లపై విచారణ సమయంలోనూ ఆయన అంతరాయం కలిగించారు. అంతకుముందు ఆయనకు మూడు నెలల జైలు శిక్ష విధించిన కోర్టు తర్వాత శిక్షను రద్దు చేసింది.