Stock Market | ముంబై, జూలై 23: నరేంద్ర మోదీ సర్కార్ ప్రవేశపెట్టిన సార్వత్రిక బడ్జెట్ స్టాక్ మార్కెట్లకు రుచించలేదు. తీవ్ర ఒడిదుడుకుల మధ్య కొనసాగిన సూచీలు చివరకు స్వల్పంగా నష్టపోయాయి. ఫ్యూచర్ అండ్ ఆప్షన్ లావాదేవీలపై పన్ను పెంచనున్నట్లు ప్రకటించడంతో ఒక దశలో 1,200 పాయింట్లకు పైగా నష్టపోయిన 30 షేర్ల ఇండెక్స్ సూచీ చివరకు 73 పాయింట్ల నష్టంతో 80,429 వద్ద ముగిసింది. ఇంట్రాడేలో 435 పాయింట్లు నష్టపోయిన నిఫ్టీ చివరకు 30.20 పాయింట్లు కోల్పోయి 24,074.20 వద్ద స్థిరపడింది. మరోవైపు కస్టమ్ డ్యూటీని తగ్గిస్తూ తీసుకున్న నిర్ణయంతో కన్జ్యూమర్ డ్యూరబుల్, ఎఫ్ఎంసీజీ రంగ షేర్లు ఈ భారీ పతనాన్ని నియంత్రించగలిగాయి.
ఆభరణాలపై కస్టమ్ డ్యూటీని తగ్గిస్తూ కేంద్ర సర్కార్ తీసుకున్న నిర్ణయంతో ఆభరణాల సూచీలు 14 శాతం వరకు లాభపడ్డాయి. వీటిలె టీబీజెడ్ షేరు 13.86 శాతం లాభపడగా, టైటాన్ షేరు 6.63 శాతం, రాజేశ్ ఎక్స్పోర్ట్స్ 6.32 శాతం, పీసీ జ్యూవెల్లర్స్ 5 శాతం, సెంకో గోల్డ్ 4.75 శాతం, కల్యాణ్ జ్యూవెల్లర్స్ 4.53 శాతం వరకు పెరిగాయి.
ఆంధప్రదేశ్కు చెందిన షేర్లు భారీగా పుంజుకున్నాయి. ఏపీ రాజధానికి రూ.15 వేల కోట్ల నిధులను కేటాయిస్తున్నట్లు ప్రకటించడంతో హెరిటేజ్ ఫుడ్స్ 5 శాతం, అవంతి ఫీడ్స్ 4.60 శాతం, కావేరీ సీడ్స్ 2.21 శాతం చొప్పున బలపడ్డాయి.