న్యూఢిల్లీ, మే 24: పోలైన ఓట్ల శాతాన్ని పోలింగ్ కేంద్రాలవారీగా వెబ్సైట్లో అప్లోడ్ చేసేలా ఇప్పుడు ఎన్నికల సంఘాన్ని ఆదేశించలేమని సుప్రీంకోర్టు స్పష్టం చేసింది. ఎన్నికల సమయంలో ఇప్పుడు ఇలాంటి ఆదేశాలు ఇస్తే అవసరమైన మానవ వనరులను సమకూర్చుకోవడం ఎన్నికల సంఘానికి కష్టమవుతుందని పేర్కొన్నది.
ఇప్పటికే ఐదు దశలు పూర్తికాగా, ఇంకా రెండు దశలు మాత్రమే మిగిలి ఉందని కోర్టు గుర్తు చేసింది. ఏయే పోలింగ్ కేంద్రంలో ఎన్ని ఓట్లు పోలయ్యాయో తెలిపే ఫామ్ 17సీ మొదటి భాగాన్ని ఎన్నికల సంఘం వెబ్సైట్లో అప్లోడ్ చేసేలా ఆదేశాలు ఇవ్వాలని కోరుతూ అసోసియేషన్ ఫర్ డెమొక్రటిక్ రీఫామ్మ్స్(ఏడీఆర్) దాఖలు చేసిన పిటిషన్ను శుక్రవారం జస్టిస్ దీపాంకర్ దత్తా, జస్టిస్ సతీశ్ చంద్రశర్మతో కూడిన సుప్రీంకోర్టు వెకేషన్ బెంచ్ విచారించింది.
ఇందులోని విజ్ఞాపనలు.. 2019 నుంచి కోర్టులో పెండింగ్లో ఉన్న మరో పిటిషన్లో కోరిన అంశాలుగానే కనిపిస్తున్నాయని కోర్టు పేర్కొన్నది. ఏడీఆర్ పిటిషన్ను ఎన్నికల తర్వాత విచారించేలా రెగ్యులర్ బెంచ్కు బదిలీ చేసింది. కాగా, ఫామ్ 17సీ మొదటి భాగాన్ని వెబ్సైట్లో అప్లోడ్ చేస్తే ఓటర్లలో గందరగోళం నెలకొంటుందని,ఇప్పటికే సుప్రీంలో ఈసీ అఫిడవిట్ దాఖలుచేసిన సంగతి తెలిసిందే.