న్యూఢిల్లీ,నవంబర్ 26: న్యాయం కోసం కోర్టులను ఆశ్రయించేవారికి డబ్బు, భాష అడ్డంకి కారాదని రాష్ట్రపతి ద్రౌపది ముర్ము అన్నారు. ఆల్ ఇండియా జ్యుడీషియల్ సర్వీసెస్ను తీసుకురావాల్సిన అవసరముందని అభిప్రాయపడ్డారు. ఆదివారం సుప్రీంకోర్టు ఆవరణలో అంబేద్కర్ విగ్రహాన్ని రాష్ట్రపతి ఆవిష్కరించారు. రాజ్యాంగ దినోత్సవం (నవంబర్ 26) సందర్భంగా సుప్రీంకోర్టు ఏర్పాటుచేసిన కార్యక్రమంలో ఆమె ముఖ్య అతిథిగా పాల్గొని ప్రసంగించారు.
దేశంలో న్యాయ సేవలు ప్రజలందరికీ అందుబాటులోకి రావాలన్నారు. ఈ కార్యక్రమానికి సీజేఐ డీవై చంద్రచూడ్, జస్టిస్ సంజయ్ కిషన్ కౌల్, సంజీవ్ ఖన్నా, కేంద్ర న్యాయమంత్రి అర్జున్రామ్ మేఘ్వాల్ తదితరులు హాజరయ్యారు. సీజేఐ డీవై చంద్రచూడ్ మాట్లాడుతూ పౌరులు కోర్టులను ఆశ్రయించడానికి భయపడవద్దన్నారు. గత ఏడు దశాబ్దాలుగా సుప్రీంకోర్టు ప్రజాకోర్టుగా పనిచేస్తుందన్నారు. ప్రజల ఆశలు, ఆకాంక్షలకు అనుగుణంగా భారత రాజ్యాంగం నిరంతరం మార్పులకు లోనవుతుందని, రాజ్యాంగ విలువలపై చర్చ కేవలం కోర్టు కేసులకు పరిమితం కాదని, వివిధ రంగాల్లోనూ ప్రభావం చూపుతుందని జస్టిస్ సంజయ్ కిషన్ కౌల్ అన్నారు.