న్యూఢిల్లీ: కేంద్రానికి డిప్యుటేషన్పై ఐపీఎస్ అధికారులను పంపించాలని రాష్ర్టాలు, కేంద్ర పాలిత ప్రాంతాలను కేంద్ర హోం శాఖ (ఎంహెచ్ఏ) రెండోసారి కోరింది. సెంట్రల్ పోలీస్ ఆర్గనైజేషన్స్ (సీపీఓ), సెంట్రల్ ఆర్మ్ పోలీస్ ఫోర్సెస్ (సీఏపీఎఫ్)లలో ఖాళీల భర్తీ కోసం ఈ లేఖను రాసింది. ఎస్పీ, ఐజీ ర్యాంక్ అధికారులను పంపించేందుకు సిఫారసులను తగిన స్థాయిలో పంపించడం లేదని గుర్తు చేసింది.
జూన్ 3నాటికి ఎస్పీ స్థాయిలో 129 ఖాళీలు ఉన్నాయని తెలిపింది. అదే విధంగా డీఐజీ ర్యాంక్ ఖాళీలు 81, ఐజీ స్థాయి అధికారుల ఖాళీలు 25 ఉన్నాయని తెలిపింది. ఎస్పీ స్థాయి ఖాళీలు సీబీఐలో 54, ఎన్ఐఏలో 13 ఉన్నట్లు వివరించింది. హిమాచల్ ప్రదేశ్, నాగాలాండ్, సిక్కిం, త్రిపుర మినహా మిగిలిన రాష్ర్టాలు, కేంద్రపాలిత ప్రాంతాల ప్రభుత్వ ప్రధాన కార్యదర్శులకు ఈ లేఖను రాసింది.