Gaurav Gogoi : ప్రధాని నరేంద్రమోదీకి సంకీర్ణ సర్కారును నడిపే లక్షణాలు లేవని కాంగ్రెస్ సీనియర్ నాయకుడు గౌరవ్ గొగోయ్ అన్నారు. ఆయన వచ్చే ఐదేళ్లలో పూర్తికాలం ప్రధానిగా కొనసాగడం సందేహాస్పదమే అని గొగోయ్ వ్యాఖ్యానించారు. సంకీర్ణ సర్కారును నడిపించడం అంత సులువు కాదని అభిప్రాయపడ్డారు.
సంకీర్ణ సర్కారును పూర్తికాలం నడపాలంటే విశాల హృదయం ఉండాలని, ఎదుటివారి అభిప్రాయాలను ఓర్పుగా వినే మనసు ఉండాలని, అందరినీ కలుపుకుపోయే మనస్తత్వం ఉండాలని గౌరవ్ గొగోయ్ చెప్పారు. ప్రధాని నరేంద్ర మోదీలో ఈ లక్షణాలేవి లేవని ఆయన వ్యాఖ్యానించారు.
ప్రధాని నరేంద్రమోదీ సుదీర్ఘకాలం ప్రధానిగా ఎలా కొనసాగారో అర్థం కావడంలేదని గౌరవ్ గొగోయ్ అన్నారు. మోదీ కంటే రాహుల్గాంధీకి ఎక్కువ లోక్సభ స్థానాలు కట్టబెట్టిన ఉత్తరప్రదేశ్ ప్రజలకు ఆయన కృతజ్ఞతలు తెలియజేశారు. వారణాసిలో మోదీకి వచ్చిన మెజారిటీ కంటే డబుల్ మెజారిటీ రాయ్బరేలీలో రాహుల్గాంధీకి వచ్చిందన్నారు.
మోదీ ప్రధానిగా పనిచేసిన రెండు పర్యాయాలు బీజేపీకి స్పష్టమైన మెజారిటీ ఉన్నదని, కానీ ఈసారి మాత్రం బీజేపీకి స్పష్టమైన మెజారిటీ రాలేదని గౌరవ్ గుర్తుచేశారు. కాబట్టి ఇప్పుడు మిత్రపక్షాల అండతో ప్రభుత్వాన్ని నడపాల్సి ఉంటుందని, ప్రధాని మోదీ ఐదేళ్లు ప్రభుత్వాన్ని నడపడంపై తనకు అత్యంత అనుమానంగా ఉందని గొగోయ్ చెప్పారు.