శ్రీనగర్, జూన్ 9: జమ్ము కశ్మీర్ అసెంబ్లీ ఎన్నికలు నిర్వహించేందుకు ఎన్నికల కమిషన్ కసరత్తు ప్రారంభించింది. ఈ నెలలోనే ఎన్నికల షెడ్యూల్ను ప్రకటించే అవకాశం ఉన్నట్టు తెలుస్తున్నది. ఆగస్టులో ఎన్నికలు పూర్తి చేయాలనే ఆలోచనతో ఈసీ ఉన్నట్టు సమాచారం. ప్రస్తుతం వర్షాకాలం కావడంతో ఎన్నికలు నిర్వహించేందుకు వాతావరణ పరిస్థితులు అంతగా అనుకూలంగా ఉండవు. అయితే, ఇటీవలి లోక్సభ ఎన్నికల్లో కశ్మీర్ ప్రజలు ఓట్లు వేసేందుకు ఉత్సాహం చూపారు.
కశ్మీర్ వ్యాలీలో 51.05 ఓటింగ్ శాతం నమోదైంది. గత మూడునాలుగు దశాబ్దాల్లో ఈసారే కశ్మీర్లో ఎన్నికలు అత్యంత ప్రశాంతంగా జరిగాయి. ప్రజలు ఓటింగ్కు ఆసక్తి చూపుతున్న నేపథ్యంలో ఎన్నికలు ఇప్పుడే నిర్వహించాలని ఈసీ భావిస్తున్నట్టు తెలుస్తున్నది.
ఇందులో భాగంగానే గుర్తింపు పొందని రిజిస్టర్డ్ పార్టీలు ఎన్నికల గుర్తులకు దరఖాస్తు చేసుకోవాలని ఈసీ ఆహ్వానించింది. కాగా, గతంలో జమ్ము కశ్మీర్ అసెంబ్లీలో 107 స్థానాలు ఉండగా ఇప్పుడు 114కు పెరిగాయి. వీటిలో 24 సీట్లు పాక్ ఆక్రమిత కశ్మీర్లో ఉండగా మిగతా 90 స్థానాలకు ఎన్నికలు జరగనున్నాయి. వీటిల్లో జమ్ము ప్రాంతంలో 43 స్థానాలు, కశ్మీర్ వ్యాలీలో 47 స్థానాలు ఉన్నాయి.