న్యూఢిల్లీ: మైక్రోసాఫ్ట్ విండోస్లో తలెత్తిన సాంకేతిక లోపంపై కేంద్ర ప్రభుత్వం స్పందించింది. సమస్య ఉత్పన్నం కాగానే ప్రభుత్వం మైక్రోసాఫ్ట్ కంపెనీతో టచ్లోకి వెళ్లిందని కేంద్ర ఎలక్ట్రానిక్స్, ఐటీ శాఖ మంత్రి అశ్విని వైష్ణవ్ శుక్రవారం ఎక్స్ పోస్టులో పేర్కొన్నారు. ఈ ఎర్రర్ కారణంగా నేషనల్ ఇన్ఫర్మేటిక్స్ సెంటర్(ఎన్ఐసీ) నెట్వర్క్ ప్రభావితం కాలేదని పేర్కొన్నారు.
ఎన్ఐసీకి చెందిన ఇన్ఫర్మేషన్ అండ్ కమ్యూనికేషన్ టెక్నాలజీ(ఐసీటీ) కేంద్ర, రాష్ట్ర ప్రభుత్వాలకు కమ్యూనికేషన్ సేవలు అందిస్తుంది. మైక్రోసాఫ్ట్లో సాంకేతిక సమస్య నేపథ్యంలో ఇండియన్ కంప్యూటర్ రెస్పాన్స్ టీమ్(సీఈఆర్టీ) ఒక అడ్వైజరీ జారీ చేసిందని మంత్రి అశ్విని వైష్ణవ్ తెలిపారు.
మైక్రోసాఫ్ట్ సాంకేతిక లోపం నేపథ్యంలో విమాన ప్రయాణికుల కోసం కేంద్ర పౌర విమానయాన శాఖ గైడ్ లైన్స్ జారీ చేసింది. ఎయిర్పోర్టుల్లో వేచి చూస్తున్న వాళ్లకు ఆహారం, మంచినీళ్లు, ఇతర సదుపాయాలు అందించాలని, విమాన సర్వీసుల సమాచారం అందజేయాలని ఆదేశించినట్టు విమానయాన శాఖ మంత్రి రామ్మోహన్ నాయుడు పేర్కొన్నారు. పరిస్థితిని మంత్రిత్వ శాఖ, ఏఏఐ నిశితంగా పరిశీలిస్తున్నదని, త్వరిత పరిష్కారం కోసం మైక్రోసాఫ్ట్తో సమన్వయం చేసుకొంటున్నట్టు చెప్పారు.