న్యూఢిల్లీ, జూలై 13: ఢిల్లీ సీఎం కేజ్రీవాల్ ఆరోగ్యంతో కేంద్రంలోని బీజేపీ చెలగాటం ఆడుతున్నదని ఆమ్ ఆద్మీ పార్టీ తీవ్రంగా ఆరోపించింది. మార్చి నుంచి తీహార్ జైలులో ఉంచిన కేజ్రీవాల్ బ్లడ్ షుగర్ లెవెల్స్ 50 ఎంజీ/డీఎల్ కన్నా తక్కువకు ఐదుసార్లు పడిపోయాయని, ఆయన బరువు సుమారు 8.5 కేజీలు తగ్గిందని ఆప్ ఎంపీ సంజయ్ సింగ్ తెలిపారు.
కేజ్రీవాల్కు నిర్బంధం నుంచి విముక్తి కల్పించి సరైన చికిత్స అందించకపోతే ఆయన ఆరోగ్యానికి తీవ్ర ముప్పు వాటిల్లే ప్రమాదముందని ఆందోళన వ్యక్తం చేశారు. కేజ్రీవాల్ అభిమానులు, పార్టీ కార్యకర్తలు, కుటుంబ సభ్యులు ఆయన ఆరోగ్యంపై తీవ్రంగా కలత చెందుతున్నారని, ఆయన ఎందుకు బరువు తగ్గిపోతున్నారో కారణాలు తెలియడం లేదన్నారు.