Stomach Cancer | న్యూఢిల్లీ, జూలై 25: ప్రపంచంలో ప్రమాదకరంగా మారుతున్న క్యాన్సర్లలో ఉదర క్యాన్సర్ ఒకటి. దీనిని గ్యాస్ట్రిక్ క్యాన్సర్ అని కూడా అంటారు. ప్రాణాంతకమైన ఈ వ్యాధి లక్షణాలను గుర్తించడం కూడా కష్టమే. సాధారణంగా ఉదర క్యాన్సర్ ప్రారంభంలో ఉండే లక్షణాలు అజీర్ణ సమస్యతో ఉండే లక్షణాలను పోలి ఉంటాయి. అయితే, ముఖంపై వచ్చే కొన్ని లక్షణాలను బట్టి ప్రారంభ దశలోనే ఉదర క్యాన్సర్ను గుర్తించవచ్చని నిపుణులు చెప్తున్నారు.
ఉదర క్యాన్సర్ వల్ల పాపులోఎరిత్రోడెర్మ అనే అరుదైన చర్మ సంబంధ సమస్య వచ్చే అవకాశం ఉంటుందని, దీని వల్ల ముఖంపై చిన్న గడ్డలు ఏర్పడటం, వాపు రావడం జరగొచ్చని పేర్కొంటున్నారు. దీంతో పాటు చర్మం పొడిబారి ఊడిపోవడం, దురద వంటి లక్షణాలూ కనిపించవచ్చని చెప్తున్నారు. శోషరసగ్రంథుల వాపుతో పాటు ఆకలి కాకపోవడం, ఒకేసారి బరువు తగ్గడం, నిత్యం కడుపు నొప్పి ఉండటం, గుండెలో మంట, అజీర్ణం, వాంతులు, వికారం, హిమోగ్లొబిన్ లోపం వంటి లక్షణాలు ఉదర క్యాన్సర్ బాధితుల్లో ఉంటాయని పేర్కొంటున్నారు. ఈ లక్షణాలను నిర్లక్ష్యం చేయవద్దని సూచిస్తున్నారు.