హైదరాబాద్, జూలై 9 (స్పెషల్ టాస్క్ బ్యూరో, నమస్తే తెలంగాణ): ‘జురాసిక్ వరల్డ్’ సినిమా చూశారా? అందులో డైనోసార్ల నుంచి ప్రాణాలు కాపాడుకోడానికి హీరో టీమ్.. టైర్లులేని ఓ క్యాప్సుల్ కారులో వెళ్లడం చూసి అబ్బురపడ్డాం కదూ. ఇప్పుడు సూరత్కు చెందిన ముగ్గురు ఇంజినీరింగ్ విద్యార్థులు కూడా ఇలా టైర్లులేని ఓ క్యాప్సుల్ కారును తయారు చేశారు.
కరెంటుతో నడిచే ఈ కారును ఒక్కసారి ఫుల్లుగా చార్జీ చేస్తే ఏకధాటిగా 80 కిలోమీటర్ల వరకూ పరుగెడుతుంది. కారు గరిష్ఠ వేగం గంటకు 35 కిలోమీటర్లు. ధర రూ. 65 వేలు. గాలి కాలుష్యం, పెట్రోల్ రేట్లు భగ్గుమంటున్న నేపథ్యంలో తమ క్యాప్సుల్ కారుకు డిమాండ్ ఉంటుందని తయారీదారులు ఆశాభావం వ్యక్తం చేస్తున్నారు. కాగా సూరత్ రోడ్లమీద రయ్యిమని పరుగెడుతున్న ఈ కారును చూడటానికి జనం గుమిగూడుతున్న వీడియోలు సోషల్మీడియాలో వైరల్గా మారాయి.