Baramati | పుణే : మహారాష్ట్రలోని బారామతి లోక్సభ నియోజకవర్గంలో ఈవీఎంలను భద్రపరచిన స్ట్రాంగ్ రూమ్లో సీసీటీవీ కెమెరాలు ఆఫ్ అయ్యాయని, ఆ సమయంలో ఏదో జరిగిందని ఎన్సీపీ (ఎస్పీ) ఆరోపించింది. ఈ నియోజకవర్గంలో ఈ నెల 7న పోలింగ్ జరిగింది. బారామతిలో ఎన్సీపీ(ఎస్పీ) తరఫున శరద్పవార్ కుమార్తె సుప్రియా సూలే పోటీచేస్తుండగా, ఎన్సీపీ(అజిత్ వర్గం) నుంచి అజిత్ పవార్ భార్య సునేత్ర పవార్ బరిలో నిలిచారు.
సుప్రియ సూలే తరపున ఎన్నికల ప్రతినిధి లక్ష్మీకాంత్ ఖబియా మాట్లాడుతూ, బారామతి లోక్సభ నియోజకవర్గంలో ఉపయోగించిన ఈవీఎంలను భద్రపరచిన ఎఫ్సీఐ గోదాములో సోమవారం ఉదయం 45 నిమిషాలు సీసీటీవీ కెమెరాలు పని చేయలేదన్నారు. దీనిపై ఎన్నికల రిటర్నింగ్ అధికారికి ఫిర్యాదు చేశామని చెప్పారు. బారామతి ఎన్నికల రిటర్నింగ్ అధికారి కవిత ద్వివేది మాట్లాడుతూ, ఎన్సీపీ (ఎస్పీ) చేసిన ఫిర్యాదుపై దర్యాప్తు చేశామన్నారు. ఈవీఎంలను భద్రపరచిన గోదాములోని ఓ కేబుల్ను ఎలక్ట్రీషియన్ తొలగించారని, ఫలితంగా డిస్ప్లే యూనిట్ షట్ డౌన్ అయిపోయిందని చెప్పారు. కెమెరాలన్నీ పని చేస్తున్నాయని, డాటా పూర్తిగా ఉందని తెలిపారు.