న్యూఢిల్లీ, జూలై 21: యూజీసీ-నెట్ పరీక్ష రద్దు చేయాలన్న కేంద్ర విద్యాశాఖ నిర్ణయాన్ని వ్యతిరేకిస్తూ సుప్రీంకోర్టులో ఒక పిటిషన్ దాఖలైంది. ప్రశ్నపత్రం లీకేజీపై సీబీఐ విచారణ పూర్తయ్యేవరకు పరీక్ష మళ్లీ నిర్వహించడంపై స్టే విధించాలని పిటిషనర్ అయిన న్యాయవాది ఉజ్వల్ గౌర్ కోర్టును కోరారు. పరీక్షను రద్దు చేయడం వల్ల అభ్యర్థులు ఒత్తిడి, ఆందోళనకు గురవుతారని.. మళ్లీ పరీక్షకు ప్రిపేర్ కావడానికి వారి వద్ద ఉన్న వనరులు అనవసరంగా ఖర్చవుతాయని వాదించారు. ఈ పిటిషన్ త్వరలోనే విచారణకు రానుంది.
నీట్ యూజీలో 11 వేల మందికి సున్నా మార్కులు
న్యూఢిల్లీ: ఈ ఏడాది నిర్వహించిన నీట్-యూజీలో 11,000 మందికిపైగా అభ్యర్థులకు సున్నా, మైనస్ మార్కులు వచ్చాయి. ఈ ఫలితాలను పరీక్షా కేంద్రాల వారీగా ఎన్టీఏ శనివారం విడుదల చేసిన సంగతి తెలిసిందే. బీహార్లో ఓ విద్యార్థికి మైనస్ 180 మార్కులు వచ్చాయి. ఈ ఏడాది అతి తక్కువ స్కోర్ ఇదే. 2,250 మందికి సున్నా మార్కులు, 9,400 మందికి సున్నా కన్నా తక్కువ మార్కులు వచ్చాయి.