న్యూఢిల్లీ, జూలై 23: జన్యుమార్పిడి చేసిన ఆవాలను సాగుకు వినియోగించాలా? వద్దా? అన్న అంశంపై సుప్రీం కోర్టు బెంచ్ భిన్న తీర్పులు వెలువరించింది. జస్టిస్ బీవీ నాగరత్న, జస్టిస్ సంజయ్ కరోల్తో కూడిన డివిజన్ బెంచ్.. జన్యుమార్పిడి చేసిన ఆవాలకు క్లియరెన్స్పై విచారణ చేపట్టింది. ఈ సందర్భంగా జస్టిస్ బీవీ నాగరత్న.. జన్యుమార్పిడి ఆవాలకు జెనెటిక్ ఇంజినీరింగ్ అప్రైజల్ కమిటీ ఆమోదం తెలపటంపై అభ్యంతరం వ్యక్తం చేశారు. భారత దేశ జీవవైవిధ్యం ప్రత్యేకమైనదని.. ఇక్కడ జన్యుమార్పిడి చేసిన ఆవాలతో ఎలాంటి ప్రభావం ఉంటుంది? అన్న దేశీయ అధ్యయనం చేయకుండానే క్లియరెన్స్ ఎలా ఇస్తారని ప్రశ్నిస్తూ ఆమోదముద్రను వ్యతిరేకిస్తూ తీర్పు ఇచ్చారు. మరోవైపు, జస్టిస్ కరోల్ మాత్రం క్లియరెన్స్ను ఆమోదించారు. ఇద్దరు న్యాయమూర్తులు వేర్వేరు తీర్పులు ఇవ్వటంతో ఈ అంశంపై సరైన తీర్పు వెలువరించేందుకు విస్తృత ధర్మాసనం ఏర్పాటుకు ఆదేశాలివ్వాలని సీజేఐకి న్యాయమూర్తులు సిఫార్సు చేశారు.