Supreme Court -ECI | పోలింగ్ ముగిసిన 48 గంటల్లో పోలింగ్ కేంద్రాల వారీగా ఓటింగ్ శాతాలను ఎన్నికల సంఘం వెబ్సైట్లో ప్రచురించాలని దాఖలైన పిటిషన్పై వారంలోపు స్పందన తెలియజేయాలని కేంద్ర ఎన్నికల సంఘాన్ని సుప్రీంకోర్టు ఆదేశించింది. అసోసియేషన్ ఫర్ డెమోక్రటిక్ రీఫార్మ్స్ (ఏడీఆర్) దాఖలు చేసిన పిటిషన్ను చీఫ్ జస్టిస్ డీవై చంద్రచూడ్ సారధ్యంలోని ధర్మాసనం శుక్రవారం విచారించింది. వారంలోగా స్పందన తెలుపాలని ఈసీని ఆదేశించిన ధర్మాసనం.. దీనిపై ఈ నెల 24న విచారిస్తామని ప్రకటించింది.
ప్రతి పోలింగ్ కేంద్రంలోనూ పోలైన ఓట్ల సంఖ్యను విడివిగా ఫామ్ -17సీ పార్ట్ 1 స్కాన్డ్ ప్రతుల రూపంలో పొందు పరిచేలా ఈసీని ఆదేశించాలని సుప్రీంకోర్టులో ఏడీఆర్ పిటిషన్ దాఖలు చేసింది. ప్రస్తుతం జరుగుతున్న లోక్ సభ ఎన్నికల తొలి దశ పోలింగ్ గత నెల 19న ముగిసినా 11 రోజుల తర్వాత ఏప్రిల్ 30న ప్రచురించారు. ఏప్రిల్ 26న జరిగిన రెండో దశ పోలింగ్ శాతాన్ని నాలుగు రోజుల తర్వాత అందుబాటులో ఉంచారు. అయితే, పోలింగ్ నాడు ఈసీ ప్రకటించిన ఓటింగ్ శాతం కంటే ఐదారు శాతం ఎక్కువగా ఏప్రిల్ 30న ప్రచురించిన గణాంకాల్లో కనిపించడంతో అనుమానాలు తలెత్తాయని ఏడీఆర్ పేర్కొంది.