న్యూఢిల్లీ, ఏప్రిల్ 27: ఆమ్ ఆద్మీ పార్టీ ఎన్నికల ప్రచార బాధ్యతలను ఆ పార్టీ జాతీయ కన్వీనర్, ఢిల్లీ ముఖ్యమంత్రి అరవింద్ కేజ్రీవాల్ సతీమణి సునీత కేజ్రీవాల్ తీసుకున్నారు. కేజ్రీవాల్ జైలులో ఉన్నందున ఆయన తరపున ప్రజల్లోకి వెళ్లాలని సునీత నిర్ణయించారు. శనివారం ఆమె తూర్పు ఢిల్లీ లోక్సభ స్థానంలో రోడ్షో నిర్వహించారు.
ఢిల్లీతో పాటు ఆమ్ ఆద్మీ పార్టీ పోటీ చేస్తున్న పంజాబ్, గుజరాత్, హర్యానాల్లో పార్టీ అభ్యర్థుల తరపున సునీత రోడ్షోలు నిర్వహిస్తారని ఢిల్లీ మంత్రి ఆతిశి తెలిపారు. మరోవైపు ఎన్నికల కోసం ఆప్ ప్రధాన కార్యాలయంలో వార్రూమ్ను ఏర్పాటు చేశారు. లోక్సభ ఎన్నికల కోసం ‘జైల్ కా జవాబ్ వోట్ సే’ నినాదంతో ఆప్ కొత్త ప్రచారాన్ని ప్రారంభించింది.