Delhi High Court | అదానీ గ్రూప్, దాని ప్రమోటర్ గౌతమ్ అదానీపై ప్రధాని నరేంద్ర మోదీ, కాంగ్రెస్ అగ్రనేత రాహుల్ గాంధీ అసత్య ఆరోపణలు చేస్తున్నారని.. భవిష్యత్లో ఎలాంటి వ్యాఖ్యలు చేయకుండా నిలువరించాలంటూ ఢిల్లీ హైకోర్టులో సోమవారం పిటిషన్ దాఖలైంది. సుర్జీత్ సింగ్ యాదవ్ అనే స్టాక్ ఇన్వెస్టర్ ఈ పిటిషన్ దాఖలు చేశారు. ఇద్దరు రాజకీయ నేతల ఆరోపణలు, ప్రత్యారోపణల కారణంగా స్టాక్ మార్కెట్లో అదానీ గ్రూప్నకు చెందిన షేర్లు ఒడుదుడుకులను ఎదుర్కొంటున్నాయని.. దాంతో ఆ గ్రూప్లో పెట్టుబడి పెట్టిన తనలాంటి ఎంతోమంది ఇన్వెస్టర్లకు నష్టం జరుగుతుందన్నారు.
గౌతమ్ అదానీ సహా పలువురు పారిశ్రామికవేత్తలకు కేంద్రం రూ.16లక్షలకోట్ల రుణాలు మాఫీ చేసిందని రాహుల్ గాంధీ ఆరోపించారని.. తాను న్యూస్ఛానెల్స్, సోషల్ మీడియాలో వార్తలు చూశానని పిటిషనర్ పేర్కొన్నారు. రాహుల్ గాంధీ ప్రసంగం తప్పుదారి పట్టించేలా ఉందని.. అయితే, ఇందులో ఎలాంటి వాస్తవం లేదన్నారు. ఈ ఆరోపణలతో అదానీ గ్రూప్ ఆఫ్ కంపెనీల ఇమేజ్ సాధారణ ప్రజలు, పెట్టుబడిదారుల దృష్టిలో తగ్గుతుందని.. పారిశ్రామికవేత్తలకు వ్యతిరేకంగా ఇలాంటి ప్రతికూల ప్రచారం స్టాక్ మార్కెట్లో అస్థిరతను కలిగిస్తుందని.. పెట్టుబడిదారులకు భారీ నష్టాలను కలిగిస్తుందని పిటిషనర్ పేర్కొన్నారు.
కేంద్రం రుణాలను మాఫీ చేయలేదని.. అవన్నీ తప్పుదోవ పట్టించేవేనన్నారు. మరోవైపు అదానీ, అంబానీ నుంచి కాంగ్రెస్ ముడుపులు తీసుకుందని తెలంగాణలో కరీంనగర్ ఎన్నికల ప్రచారం సందర్భంగా మోదీ ఆరోపించారని.. ఇన్వెస్టర్ల ప్రయోజనాలను దృష్టిలో పెట్టుకొని ఎలాంటి ఆరోపణలు చేయకుండా నిలువరించాలని పిటిషన్లో పేర్కొన్నారు. అయితే, ఈ పిటిషన్పై స్పందించేందుకు అదానీ గ్రూప్ ప్రతినిధి నిరాకరించారు.