న్యూఢిల్లీ, జూలై 25: రాజ్యాంగం ప్రకారం తమ పరిధికి మించిన అంశాల్లో రాష్ట్ర ప్రభుత్వాలు చొరబడలేవని విదేశాంగ మంత్రిత్వ శాఖ స్పష్టం చేసింది. విదేశాంగ శాఖ అధికార ప్రతినిధి రణధీర్ జైస్వాల్ మీడియా మాట్లాడుతూ రాజ్యాంగంలోని ఏడో షెడ్యూల్ ప్రకారం విదేశీ వ్యవహారాలు, ఇతర దేశాలతో సంబంధాల అంశాల్లో కేంద్ర ప్రభుత్వానికే విశేషాధికారం ఉంటుందని పేర్కొన్నారు.
ఇది పూర్తిగా కేంద్రానికి సంబంధించిన అంశమని, ఉమ్మడి జాబితాలో లేదని అన్నారు. ఐఏఎస్ అధికారిణి కే వాసుకిని విదేశాంగ కార్యదర్శిగా నియమిస్తూ కేరళ ప్రభుత్వం ఇటీవల అసాధారణ నిర్ణయం తీసుకొన్న నేపథ్యంలో విదేశాంగ శాఖ ఈ మేరకు స్పందించింది. కార్మిక, నైపుణ్యాభివృద్ధి శాఖ కార్యదర్శిగా ఉన్న ఆమెను విదేశీ సహకారానికి సంబంధించిన అంశాలు సైతం చూసుకోవాల్సిందిగా కేరళ ప్రభుత్వం అదనపు బాధ్యతలు అప్పగించింది.