SP Chief : యూపీలో యోగి ఆదిత్యానాథ్ సారధ్యంలోని బీజేపీ ప్రభుత్వం అస్ధిరతతో సతమతమవుతున్నదని ఎస్పీ చీఫ్, యూపీ మాజీ సీఎం అఖిలేష్ యాదవ్ అన్నారు. బీజేపీ నేతలు అంతర్గత కుమ్ములాటలతో కీచులాడుకుంటున్నారని ఆరోపించారు. కాషాయ నేతల మధ్య ఆధిపత్య పోరుతో అభివృద్ధి అటకెక్కిందని అన్నారు. బీజేపీ ప్రభుత్వం ఉపాధ్యాయులను వేధిస్తున్నదని పేర్కొన్నారు.
అఖిలేష్ యాదవ్ బుధవారం లక్నోలో మీడియా ప్రతినిధులతో మాట్లాడారు. రాష్ట్ర రాజధాని లక్నోలో గృహాల కూల్చివేత నిర్ణయాన్ని వాయిదా వేశారని, యోగి సర్కార్ బలహీనపడుతున్నదనేందుకు ఇది విస్పష్ట సంకేతమని చెప్పారు. కాగా, ఉత్తరప్రదేశ్ సీఎం యోగి ఆదిత్యనాథ్ డిప్యూటీ సీఎం కేశవ్ ప్రసాద్ మౌర్య మధ్య విభేదాలు మరింతగా ముదిరినట్లు తెలుస్తున్నది. మరోవైపు డిప్యూటీ సీఎం కేశవ్ ప్రసాద్ మౌర్య మంగళవారం ఢిల్లీకి వెళ్లారు. కేంద్ర మంత్రి, బీజేపీ అధ్యక్షుడు జేపీ నడ్డాతో ఆయన సమావేశమయ్యారు.
ఉత్తరప్రదేశ్ బీజేపీ చీఫ్ భూపేందర్ చౌదరితో కూడా జేపీ నడ్డా ప్రత్యేకంగా భేటీ అయ్యారు. లోక్సభ ఎన్నికల్లో యూపీలో బీజేపీ పేలవ ప్రదర్శన తర్వాత సీఎం యోగి ఆదిత్యనాథ్, డిప్యూటీ సీఎం కేశవ్ మౌర్య మధ్య విభేదాలు మరింతగా పెరిగినట్లు తెలుస్తున్నది. ఈ నేపథ్యంలో యూపీలో పార్టీ వ్యూహాన్ని రూపొందించేందుకు ఈ సమావేశాలు జరిగినట్లు సమాచారం. బీజేపీ ప్రధాన కార్యాలయం నుంచి బయటకు వెళ్లేటప్పుడు మౌర్య మీడియాతో మాట్లాడలేదు.
Read More :
Janhvi Kapoor | మరో తెలుగు సినిమాకు జాన్వీ కపూర్ గ్రీన్ సిగ్నల్ ఇచ్చిందా!