Economic Survey : దేశం పేదరికం, నిరుద్యోగంతో సతమతమవుతుంటే సమస్యలను కప్పిపుచ్చేలా కేంద్ర ప్రభుత్వం ఆర్ధిక సర్వేలో వెల్లడించడం విచారకరమని బీజేడీ ఎంపీ సస్మిత్ పాత్రా అన్నారు. ఈరోజుఆర్ధిక మంత్రి నిర్మలా సీతారామన్ పార్లమెంట్ ముందుంచిన ఆర్ధిక సర్వే సమస్యలను మరుగుపరిచే కాస్మెటిక్ సర్జరీలా ఉందనేది తన అభిప్రాయమని చెప్పారు. ఆర్ధిక సర్వే సంపన్నులను మెప్పించవచ్చు కానీ పేదలను కాదని స్పష్టం చేశారు.
ఇవాళ నిత్యావసరాల ధరలు భగ్గుమంటున్న పరిస్ధితి చూస్తున్నామని, ఆర్ధిక సర్వే గారడీ వెనుక ప్రభుత్వం అసలు సమస్యలను దాచే ప్రయత్నం చేసిందని మండిపడ్డారు. అసలు వాస్తవాలేంటనేది దేశంలోని 120 కోట్ల మంది ప్రజలకు తెలుసునని చెప్పారు. కేంద్రంలోని ప్రభుత్వం పదేండ్ల పాలన అనంతరం మూడోసారి వరుసగా అధికారంలోకి వచ్చినా దేశ ప్రజలు ఆశించిన పాలన అందించడం, వారి న్యాయమైన డిమాండ్లను నెరవేర్చడంలో దారుణంగా విఫలమైందని బీజేడీ ఎంపీ అన్నారు.
కాగా, పార్లమెంట్లో ప్రభుత్వం సోమవారం ఆర్ధిక సర్వేను సమర్పించింది. బడ్జెట్కు ముందు సభ ముందుంచిన ఈ ఆర్ధిక సర్వేలో ప్రభుత్వం కీలక వివరాలు వెల్లడించింది. ఆర్ధిక వ్యవస్ధ సానుకూల సంకేతాలతో మెరుగైన వృద్ధి రేటును సాధించనున్నట్టు తెలిపింది. 2024-25లో 6.5-7 శాతం వృద్ధి రేటు సాధించే అవకాశం ఉందని అంచనా వేసింది. 2023 ఆర్ధిక సంవత్సరంలో వెల్లడైన ఆర్ధిక ఉత్తేజం ఈ ఏడాది కూడా కొనసాగుతుందని ఆశాభావం వ్యక్తం చేసింది.
అంతర్జాతీయంగా పలు సవాళ్లు ఉన్నప్పటికీ మన ఆర్ధిక వ్యవస్ధ స్ధిరత్వాన్ని కొనసాగిస్తూ వాటి ప్రభావాలను దేశ ఆర్ధిక వ్యవస్ధపై పడకుండా నిరోధిస్తుందని పేర్కొంది. నిలకడైన వినిమయ డిమాండ్, ఇన్వెస్ట్మెంట్ డిమాండ్ ఊతంగా 2024-25 ఆర్ధిక సంవత్సరంలోనూ మెరుగైన వృద్ధి రేటు సాధిస్తుందని తెలిపింది. కాగా, అంతకుముందు పార్లమెంట్ బడ్జెట్ సమావేశాలు సోమవారం ఉదయం 11 గంటలకు ప్రారంభమయ్యాయి.
Read More :
Prabhas Fauji | ఇండో-పాక్ లవ్ స్టోరీ.. ప్రభాస్తో రొమాన్స్ చేయనున్న పాకిస్థాన్ బ్యూటీ.?