Reels | పాలి, జూలై 14: సోషల్ మీడియాలో రీల్స్ పిచ్చి దంపతుల ప్రాణాల మీదకు తెచ్చింది. రాజస్థాన్ పాలిలోని గోరంఘాట్ బ్రిడ్జిపై సోషల్ మీడియాలో రీల్ కోసం శనివారం మధ్యాహ్నం భార్యాభర్తలు వచ్చి ఫొటో షూట్ చేస్తున్నారు. అయితే బ్రిడ్జిపై అకస్మాత్తుగా రైలు వచ్చింది.
పక్కన నిలబడేందుకు సైతం చోటు లేకపోవడంతో వారు దిక్కుతోచక ప్రాణాలు దక్కించుకోవడానికి 90 అడుగుల కింద ఉన్న వాగులోకి దూకేశారు. దీంతో భార్యాభర్తలిద్దరూ తీవ్రంగా గాయపడగా, భర్త పరిస్థితి ఆందోళనకరంగా ఉంది. ఈ ప్రమాదానికి సంబంధించిన దృశ్యాలు వీడియోలో రికార్డయ్యాయి. కాగా, ప్రకృతి అందాలకు గోరంఘాట్ బ్రిడ్జి కేంద్రంగా ఉండటంతో ఇక్కడకు పలువురు వచ్చి ప్రమాదకర పరిస్థితుల్లో ఫొటోలు, వీడియోలు తీసుకుంటున్నారు.