Bangladesh | ఢాకా/కోల్కతా: బంగ్లాదేశ్లో వివాదానికి, తీవ్ర ఉద్రిక్తతలకు దారితీసిన ప్రభుత్వ ఉద్యోగాల్లో రిజర్వేషన్ల అంశంపై ఆ దేశ సుప్రీంకోర్టు ఆదివారం కీలక తీర్పు వెలువరించింది. స్వాతంత్య్ర ఉద్యమంలో పోరాడిన వాళ్ల కుటుంబాలకు రిజర్వ్ చేసిన 30 శాతం రిజర్వేషన్ కోటాను 5 శాతానికి తగ్గించాలని ఆదేశించింది. 93 శాతం ఉద్యోగాలు ప్రతిభ ఆధారంగా భర్తీ చేయాలని స్పష్టం చేసింది. మిగతా రెండు శాతం ఉద్యోగాలను మైనార్టీలు, ట్రాన్స్జెండర్లు, వికలాంగులకు కేటాయించాలని పేర్కొన్నది.
తీర్పు నేపథ్యంలో రిజర్వేషన్లకు వ్యతిరేకంగా గత కొద్ది రోజులుగా ఆందోళనలు చేస్తున్న విద్యార్థులకు పాక్షిక విజయం దక్కినట్టు అయింది. విద్యార్థుల ఆందోళనల నేపథ్యంలో ఈ రిజర్వేషన్లను ప్రభుత్వం 2018లో నిలిపివేసింది. అయితే ఈ ఏడాది జూన్లో బంగ్లాదేశ్ హైకోర్టు కోటాను పునరుద్ధరించింది. దీంతో విద్యార్థులు ఆందోళనలు చేపట్టడంతోపాటు సుప్రీంకోర్టులో పిటిషన్లు దాఖలు చేశారు. రిజర్వేషన్ల కోటాపై సుప్రీంకోర్టు తీర్పు నేపథ్యంలో దేశ వ్యాప్తంగా విధించిన కర్ఫ్యూను ఆదివారం పొడిగించారు.
మా తలుపులు తెరిచే ఉంటాయి: మమత
బంగ్లాదేశ్లో హింసాత్మక పరిస్థితులపై పశ్చిమబెంగాల్ సీఎం మమతా బెనర్జీ స్పందించారు. కష్టాలతో పొరుగు దేశం నుంచి వచ్చే వాళ్లకు తమ రాష్ట్రం తలుపులు తెరిచే ఉంటాయని, వారికి ఆశ్రయం ఇస్తామని ఆదివారం పేర్కొన్నారు.