బాగల్కోట్: కర్ణాటకలోని బాగల్కోట్ జిల్లా బనహట్టి తాలుకాలో 25 వేళ్లతో అరుదైన మగ శిశువు జన్మించాడు. క్రోమోజోముల్లో మార్పుల వల్లే ఇలాంటి అరుదైన ఘటనలు జరుగుతుంటాయని వైద్యులు తెలిపారు. ఒకటి లేదా అంతకంటే ఎక్కువ వేళ్లతో జన్మించడాన్ని పాలిడక్ట్లీ అంటారని వివరించారు. శిశువు కుడి చేతికి ఆరు వేళ్లు, ఎడమ చేతికి ఏడు వేళ్లు, రెండు కాళ్లకు చెరో ఆరు వేళ్లు ఉన్నాయని వైద్యులు తెలిపారు. తమ గ్రామ దేవత భువనేశ్వరి దేవి ఆశీర్వాదం వల్లే అరుదైన శిశువు తమ ఇంట్లో జన్మించాడని శిశువు కుటుంబం సంతోషిస్తున్నది. శిశువును చూసేందుకు భారీగా ప్రజలు తరలివస్తున్నారు.