Rahul Gandhi – NEET | ఎంబీబీఎస్ సహా పలు వైద్య విద్యాకోర్సుల్లో అడ్మిషన్ల కోసం నిర్వహించే ‘నీట్ యూజీ-2024’లో అవకతవకలు జరిగాయన్న ఆరోపణలపై ప్రధాని నరేంద్రమోదీ ఎందుకు ‘మౌనం’గా ఉన్నారని కాంగ్రెస్ పార్టీ నేత రాహుల్ గాంధీ ప్రశ్నించారు. పరీక్షా పత్రాల లీకేజీకి వ్యతిరేకంగా సమర్థవంతమైన విధానాలు రూపొందించాలని కోరుతూ పార్లమెంట్ లోనూ, పార్లమెంట్ బయటా యువత పక్షాన వాణి వినిపిస్తాం అని మంగళవారం ‘ఎక్స్ (మాజీ ట్విట్టర్)’ వేదికపై ఒక పోస్టు చేశారు. బీజేపీ పాలిత రాష్ట్రాలు బీహార్, గుజరాత్, హర్యానా రాష్ట్రాల్లో పరీక్షల్లో ‘వ్యవస్థీకృత అవినీతి’ చోటు చేసుకుందని స్పష్టంగా కనిపిస్తోందన్నారు. పరీక్షా పత్రాల లీకేజీకి బీజేపీ పాలిత రాష్ట్రాలు కేంద్రంగా నిలిచాయని ఎద్దేవా చేశారు.
‘నీట్ పరీక్ష రాసిన 24 లక్షల మంది విద్యార్థుల భవితవ్యం ఆందోళనకరంగా మారుతున్నా ప్రధాని నరేంద్రమోదీ సహజ సిద్ధంగా మౌనం పాటిస్తున్నారు’ అని ‘ఎక్స్’లో హిందీలో రాశారు. బీజేపీ పాలిత రాష్ట్రాలు పరీక్షా పత్రాల లీకేజీకి కేంద్రంగా మారాయనడానికి ఆ రాష్ట్రాల్లో జరుగుతున్న అరెస్టులే నిదర్శనం అని రాహుల్ గాంధీ వ్యాఖ్యానించారు. వివిధ పరీక్షల ప్రశ్నాపత్రాల లీకేజీకి వ్యతిరేకంగా కఠినమైన చట్టాలు తీసుకొచ్చి యువత భవిష్యత్కు బాటలు వేస్తామని కాంగ్రెస్ పార్టీ తన లోక్ సభ ఎన్నికల మ్యానిఫెస్టోలో పేర్కొంది. యువత వాణిని వినిపించేందుకు, వారి భవిష్యత్ కోసం కఠిన విధానాలు రూపొందించేందుకు కేంద్రంపై విపక్ష పార్టీగా ఒత్తిడి తెస్తామని స్పష్టం చేశారు. నీట్ యూజీ -2024 నిర్వహణలో ‘0.001 శాతం’ నిర్లక్ష్యం జరిగినా సహించే ప్రసక్తి లేదని సుప్రీంకోర్టు స్పష్టం చేసిన నేపథ్యంలో రాహుల్ వ్యాఖ్యలకు ప్రాధాన్యం ఏర్పడింది.