స్టాక్ మార్కెట్లో మదుపు చేసే ఐదు కోట్ల కుటుంబాలకు ప్రధాని, కేంద్ర హోమంత్రి ఎందుకు పెట్టుబడి సలహాలు ఇచ్చారని కాంగ్రెస్ నేత రాహుల్ గాంధీ ప్రశ్నించారు. వారి పని పెట్టుబడి సలహాలు ఇవ్వడమా అని ఆయన నిలదీశారు. షేర్ల విలువను తారుమారు చేసిన ఆరోపణలపై సెబీ దర్యాప్తును ఎదుర్కొంటున్న బిజినెస్ గ్రూప్నకు చెందిన మీడియా సంస్ధలకు ఇచ్చిన పలు ఇంటర్వ్యూల్లోనే ఎందుకు వీరు పెట్టుబడి సలహాలను ఇచ్చారని ప్రశ్నించారు.
తప్పుడు ఎగ్జిట్ పోల్ ఫలితాలు ఇచ్చిన వారికి, బీజేపీకీ, ఐదు కోట్ల వేతన జీవుల కష్టార్జితాన్ని కొల్లగొట్టేందుకు ఎగ్జిట్ పోల్స్కు ఒక్కరోజు ముందు పెట్టుబడి పెట్టిన విదేశీ ఇన్వెస్టర్ల మధ్య ఉన్న సంబంధం ఏంటని రాహుల్ గాంధీ ప్రశ్నించారు. ఈ వ్యవహారంపై సంయుక్త పార్లమెంటరీ కమిటీ (జేపీసీ)చే విచారణ జరిపించాలని డిమాండ్ చేశారు. దీని వెనుక భారీ కుట్ర, కుంభకోణం ఉందని అన్నారు. షేర్లు కొనాలని ప్రధాని, కేంద్ర హోంమంత్రి సూచనలతో పెట్టుబడిన పెట్టిన భారత రిటైల్ ఇన్వెస్టర్ల వేలాది కోట్ల రూపాయల సొమ్మును కొందరు కాజేశారని ఆరోపించారు.
ఈ మొత్తం వ్యవహారంపై విచారన జరిపించాలని తాము డిమాండ్ చేస్తున్నామని అన్నారు. ఇది అదానీ అంశంతో ముడిపడిన నిగూఢ అంశమని, ఇందులో ప్రధాని, కేంద్ర హోంమంత్రి నేరుగా జోక్యం చేసుకున్నారని ఆరోపించారు. ఐబీ నివేదికలు, పార్టీ వర్గాల సమాచారం ఆధారంగా ఎన్నికల ఫలితాలపై వీరికి ఓ అంచనా ఉంటుందని, అయితే ఈ డేటా ఆధారంగా షేర్లు కొనాలని రిటైల్ ఇన్వెస్టర్లకు ఓ ప్రధాని సలహా ఇవ్వడం దేశంలో ఇంతవరకూ ఎన్నడూ జరగలేదని రాహుల్ గాంధీ గుర్తుచేశారు.
స్టాక్ మార్కెట్పై ఓ ప్రధాని ఎన్నడూ వ్యాఖ్యలు చేయలేదని, కానీ ప్రధాని తొలిసారిగా పలుమార్లు స్టాక్ మార్కెట్ పెరుగుతుందని ఎన్నో సందర్భాల్లో చెప్పారని తెలిపారు. ఎగ్జిట్ పోల్స్ అంచనాలు తప్పని ప్రధానికి సమాచారం ఉందని, అసలేం జరగుతుందనేది ఐబీ డేటా, పార్టీ గణాంకాలు ఆధారంగా ఆయనకు తెలుసని రాహుల్ పేర్కొన్నారు.
Read More :