రాయ్పూర్: ఛత్తీస్గఢ్ కాంగ్రెస్ నేత రాధిక ఖేరా ఆ పార్టీకి రాజీనామా చేశారు. ఆ పార్టీ జాతీయ అధ్యక్షుడు మల్లికార్జున ఖర్గేకు తన రాజీనామా లేఖను పంపించారు. కాంగ్రెస్లో మహిళలకు గౌరవం లేదన్నారు. తాను అయోధ్యలోని రామాలయాన్ని సందర్శించి, బాల రాముని దర్శించుకోకుండా ఉండలేకపోయానని, అందుకే తనపై పార్టీలో విమర్శలు వస్తున్నాయని ఆవేదన వ్యక్తం చేశారు. రాధిక మీడియాతో మాట్లాడుతూ, తాను పార్టీని ఎన్నడూ ధిక్కరించలేదని, పూర్తి అంకితభావంతో, నిజాయితీతో పని చేశానని చెప్పారు. కేవలం తాను అయోధ్యను సందర్శించినందుకు, తాను హిందువును అయినందుకు, సనాతన ధర్మాన్ని అనుసరిస్తున్నందుకు తనకు న్యాయం జరగలేదని ఆరోపించారు. కాంగ్రెస్ పోరాటం శ్రీరామునితోనా? ఏదైనా రాజకీయ పార్టీతోనా? అనే అంశాన్ని తేల్చుకోవాలన్నారు.