న్యూఢిల్లీ : ప్రశ్నించే వారిని చూసి ప్రధాని నరేంద్ర మోదీ ఎందుకు భయపడుతున్నారని కాంగ్రెస్ నేత ప్రియాంక గాంధీ కాషాయ సర్కార్ను నిలదీశారు. వివిధ అంశాలపై ఎదురవుతున్న ప్రశ్నలను ఓపికగా వినాలని ఆమె కేంద్ర పాలకులను కోరారు. కాంగ్రెస్ అధినేత్రి సోనియా గాంధీని ఈడీ ప్రశ్నించడాన్ని వ్యతిరేకిస్తూ మహిళా ఎంపీలు, కార్యకర్తలు నిరసన చేపట్టగా వారిని ఢిల్లీ పోలీసులు బుధవారం అదుపులోకి తీసుకున్న నేపధ్యంలో ప్రియాంక గాంధీ ఈ వ్యాఖ్యలు చేశారు.
ఈ ఎంపీలను ప్రజలు ఎన్నుకుని పార్లమెంట్కు పంపారని ఇది ప్రధాని మోదీ గుర్తెరగాలని అన్నారు. ద్రవ్యోల్బణం, నిరుద్యోగం మీద ప్రజల తరపున తాము ప్రశ్నిస్తున్నామని చెప్పారు. ప్రశ్నలు లేవనెత్తినందుకు మహిళా ఎంపీల దుస్తులు చింపడం, జుట్టుపట్టి లాగడం రాక్షసత్వానికి పరాకాష్టని ప్రియాంక ఆందోళన వ్యక్తం చేశారు. ప్రజాస్వామ్యంలో వివిధ అంశాలపై వ్యక్తమయ్యే ప్రశ్నలను మీరు వినాలని హితవు పలికారు.
అసలు ప్రశ్నలంటే మీరు ఎందుకు భయపడుతున్నారంటూ మోదీని నిలదీస్తూ మహిళా ఎంపీల నిరసన దృశ్యాలకు సంబంధించిన వీడియోను ఆమె ట్వీట్ చేశారు. ఇక పార్లమెంట్ వర్షాకాల సమావేశాల సందర్భంగా కాంగ్రెస్ సహా విపక్ష సభ్యులు ధరల పెరుగుదల, జీఎస్టీ, నిరుద్యోగం వంటి సమస్యలను లేవనెత్తుతూ ప్రభుత్వాన్ని ఇరుకునపెడుతున్నారు.