న్యూఢిల్లీ: బ్రిటిష్ కాలంనాటి చట్టాలకు బదులుగా పార్లమెంటు ఇటీవల ఆమోదించిన మూడు నేర బిల్లులకు రాష్ట్రపతి ద్రౌపది ముర్ము సోమవారం ఆమోదం తెలిపారు. దీంతో భారతీయ న్యాయ సంహిత, భారతీయ నాగరిక్ సురక్ష సంహిత, భారతీయ సాక్ష్య చట్టం చట్టాలుగా మారాయి. భారత శిక్షా స్మృతి, కోడ్ ఆఫ్ క్రిమినల్ ప్రొసీజర్ కోడ్, భారతీయ సాక్ష్యాధార చట్టం, 1872లకు బదులుగా వీటిని కేంద్ర ప్రభుత్వం తీసుకొచ్చింది. కేంద్ర హోం మంత్రి అమిత్ షా ఈ బిల్లులపై పార్లమెంటులో మాట్లాడుతూ, శిక్ష విధించడం కన్నా న్యాయాన్ని అందజేయడంపైనే ప్రధానంగా దృష్టి పెట్టామన్నారు. దేశంలోని క్రిమినల్ జస్టిస్ సిస్టమ్ను సంపూర్ణంగా ప్రక్షాళన చేయడం కోసం ఈ కొత్త చట్టాలను రూపొందించినట్లు ప్రభుత్వం తెలిపింది. మరోవైపు టెలికం బిల్లుకు కూడా రాష్ట్రపతి ఆమోదం తెలిపారు.