Pralhad Joshi : కర్నాటకలో కాంగ్రెస్ ప్రభుత్వం అవినీతిలో కూరుకుపోయిందని కేంద్ర మంత్రి ప్రహ్లాద్ జోషీ ఆరోపించారు. ముడా స్కామ్లో స్వయంగా కర్నాటక సీఎం లబ్ధిదారుడని, వాల్మీకి స్కామ్లోనూ అవినీతి చోటుచేసుకుందని ఆయన పేర్కొన్నారు. పార్లమెంట్ ఉభయసభల్లో బీజేపీ ఎంపీలు ఈ అంశాలను లేవనెత్తారని, కాంగ్రెస్ సభ్యులు అవినీతి కర్నాటక సర్కార్ కొమ్ముకాస్తున్నారని ఆరోపించారు.
ఈ స్కామ్ల్లో కాంగ్రెస్ హైకమాండ్కు వాటాలు అందుతున్నాయని దుయ్యబట్టారు. పార్లమెంట్లో ఈ స్కామ్లపై బీజేపీ ఎంపీలను మాట్లాడనీయకుండా కాంగ్రెస్ ఎంపీలు అడ్డుకున్నారని ఆరోపించారు. ఈ అంశంపై సీబీఐ విచారణకు తాము డిమాండ్ చేస్తున్నామని మంత్రి తెలిపారు. కాగా, కర్నాటకలో కాంగ్రెస్ ప్రభుత్వం కొలువుతీరిన అనంతరం అవినీతి రాజ్యమేలుతోందని, రాష్ట్రం కుంభకోణల మయమైందని బీజేపీ ఎంపీ సుధాన్షు త్రివేది ఆరోపించారు.
కర్నాటకలో ఇటీవల అవినీతి పెచ్చుమీరిందని, బలహీనవర్గాలు,అణగారిన వర్గాల అభ్యున్నతికి ఉద్దేశించిన నిధులను అవినీతితో రాజకీయ, వ్యక్తిగత ప్రయోజనాల కోసం వాడుకుంటున్నారని ఆయన పేర్కొన్నారు.రాష్ట్రంలో వెలుగుచూసిన స్కామ్లపై అత్యున్నత స్ధాయి దర్యాప్తు చేపట్టాలని తాము డిమాండ్ చేస్తున్నామని చెప్పారు. అవినీతి బాగోతాల వ్యవహారంలో కర్నాటక సీఎం సిద్ధరామయ్య నైతిక బాధ్యత వహించాలని ఆయన కోరారు.
Read More :
Stomach Cancer | ముఖంపై ‘ఉదర క్యాన్సర్’ లక్షణాలు!