న్యూఢిల్లీ, మార్చి 19: పోలింగ్ రోజు ఎన్నికల వార్తలను కవర్ చేసే జర్నలిస్టులతో పాటు అత్యవసర సేవల్లో ఉన్న వారందరూ పోస్టల్ బ్యాలెట్ సౌకర్యాన్ని వినియోగించుకోవచ్చని కేంద్ర ఎన్నికల సంఘం వెల్లడించింది. మెట్రోలు, రైల్వే తదితర విభాగాల్లో పోలింగ్ రోజు సేవలందించే వారంతా పోస్టల్ బ్యాలెట్ ద్వారా ఓటు హక్కును వినియోగించుకోవచ్చని ఈసీ తెలిపింది. ఈ మేరకు అన్ని రాష్ర్టాల ప్రధాన ఎన్నికల అధికారులకు నోటిఫికేషన్ జారీ చేసింది. ఓటరుగా నమోదు చేసుకున్న పార్లమెంటరీ నియోజకవర్గంలోని సంబంధిత జిల్లా ఎన్నికల అధికారి కార్యాలయం నుంచి ఫారం 12డీని తీసుకోవాలని ఈసీ సూచించింది. లేదంటే ప్రధాన ఎన్నికల అధికారి వెబ్సైట్ నుంచి కూడా ఈ ఫారంను డౌన్లోడ్ చేసుకోవచ్చు.