Lok Sabha Elections | సిమ్లా, మే 27: హిమాచల్ప్రదేశ్లో ఎన్నికల వేడి సెగలు పుట్టిస్తున్నది. లోక్సభ ఎన్నికల చివరి విడతలో భాగంగా జూన్ 1న రాష్ట్రంలోని నాలుగు స్థానాలకు ఎన్నికలు జరుగనున్నాయి. కాంగ్రెస్ నుంచి బీజేపీలో చేరిన ఆరుగురు ఎమ్మెల్యేలు అనర్హతకు గురికావడంతో ఆ స్థానాలకు కూడా ఈ విడతలోనే ఉప ఎన్నికలు జరుగుతున్నాయి. ఈసారి ఈ ఆరుగురు బీజేపీ టికెట్పై పోటీచేస్తున్నారు. బీఎస్పీ బరిలో ఉన్నప్పటికీ, రాష్ట్రంలో ప్రధానంగా బీజేపీ, కాంగ్రెస్ మధ్యనే పోటీ నెలకొన్నది. 2014, 2019లో జరిగిన లోక్సభ ఎన్నికల్లో నాలుగు స్థానాలనూ(సిమ్లా, కంగ్రా, హమీర్పూర్, మండి) బీజేపీ కైవసం చేసుకున్నది. అయితే ఈసారి కమలం పార్టీకి గెలుపు అంత సులువు కాదనే అభిప్రాయాలు వ్యక్తమవుతున్నాయి.
హిమచల్ప్రదేశ్ బీజేపీ జాతీయ అధ్యక్షుడు జేపీ నడ్డా సొంత రాష్ట్రం. ఈ నేపథ్యంలో ఈసారి కూడా లోక్సభ ఎన్నికల్లో కాంగ్రెస్కు చాన్స్ ఇవ్వకూడదని భావిస్తున్నది. అసెంబ్లీ ఎన్నికల సమయంలో యువతకు లక్ష ఉద్యోగాలు, ఉచిత విద్యుత్తు, మహిళలకు నెలవారీ ఆర్థిక సాయం వంటి హామీలను కాంగ్రెస్ ప్రభుత్వం నెరవేర్చలేదని ప్రధాని మోదీ, అమిత్షా సహా బీజేపీ నేతలు విస్తృతంగా ప్రచారం చేస్తున్నారు. రామ మందిరం, ఆర్టికల్ 370 రద్దు, యూసీసీ వంటి అంశాలు ఓట్లు రాలుస్తాయని ఆశలు పెట్టుకొన్నది. ప్రధానంగా మోదీ కరిష్మాపైనే బీజేపీ ఆధారపడుతున్నది. వరదల సమయంలో కేంద్రం నుంచి సరైన సహకారం అందకపోవడంపై రాష్ట్ర ప్రజల్లో బీజేపీపై అసంతృప్తి నెలకొన్నది.
తమ ఒకటిన్నరేండ్ల ప్రభుత్వ పనితీరును చూసి ఓటేయాలని సీఎం సుఖ్విందర్ సింగ్ సుఖు ప్రజలను కోరుతున్నారు. రాష్ట్రంలోని కాంగ్రెస్ ప్రభుత్వాన్ని అస్థిరపరిచేందుకు, కూల్చేందుకు బీజేపీ కుట్రలు చేస్తున్నదని కమలం పార్టీని లక్ష్యంగా చేసుకొని విమర్శలు చేస్తున్నారు. రాష్ట్రం పట్ల కేంద్రం వివక్ష చూపుతున్నదని, విపత్తులో సమయంలో ఎలాంటి సాయం చేయలేదని కాంగ్రెస్ ఆరోపిస్తున్నది.
మౌలిక సదుపాయాల అభివృద్ధి, కనెక్టివిటీ వంటి అంశాలు ఎన్నికల సమయంలో రాష్ట్రంలో ప్రధానాంశాలుగా ఉన్నాయి. ప్రతిపాదిత ఎయిర్పోర్టు నిర్మాణం, రైలు కనెక్టివిటీ సదుపాయాలతోపాటుగా హైవేల వెంబడి పర్యాటక సదుపాయాలు ఏర్పాటు చేయాలని స్థానికులు డిమాండ్ చేస్తున్నారు. మరోవైపు నిరుద్యోగం, ద్రవ్యోల్బణం వంటి అంశాలపై విపక్షాలు కేంద్రంలోని అధికార బీజేపీని లక్ష్యంగా చేసుకొంటున్నాయి.
రాష్ట్ర కాంగ్రెస్ పార్టీ అంతర్గత పోరుతో సతమతమవుతున్నది. ఇప్పటికే ఆరుగురు ఎమ్మెల్యేలు బీజేపీ పంచన చేరారు. ఈ నేపథ్యంలో లోక్సభ ఎన్నికల్లో గెలువడంతోపాటు ఉప ఎన్నికల్లోనూ విజయం సాధించడం కాంగ్రెస్కు సవాల్గా మారిం ది. అధికారంలో ఉన్న రాష్ట్రంలోనే గెలువలేకపోతే, అది ప్రతికూల సంకేతాలు పంపే అవకాశం ఉన్నదని హస్తం పార్టీ నేతలు భావిస్తున్నారు. అసెంబ్లీలో అతిస్వల్ప మెజార్టీతో నెట్టుకొస్తున్న రాష్ట్ర ప్రభుత్వాన్ని ఎలాంటి అస్థిరత లేకుండా కొనసాగించాలంటే, ఉప ఎన్నికలు జరుగుతున్న స్థానాలను గెలుచుకోవడం కాంగ్రెస్కు తప్పనిసరి అని రాజకీయ విశ్లేషకులు అంటున్నారు. లేకుంటే భవిష్యత్తులో ఏ పరిణామాలైనా చోటుచేసుకొనే అవకాశం లేకపోలేదని, ప్రభుత్వ మనుగడకే ముప్పు రావొచ్చని విశ్లేషిస్తున్నారు. 68 స్థానాలు ఉన్న హిమాచల్ప్రదేశ్ అసెంబ్లీలో ఆరుగురు ఎమ్మెల్యే ఫిరాయింపు తర్వాత మెజార్టీ మార్క్ 32గా ఉన్నది. ప్రస్తుతం కాంగ్రెస్కు 34 మంది ఎమ్మెల్యేలు ఉన్నారు.