Congress | లక్నో, మే 16: కేంద్రంలో ఏ పార్టీ అధికారంలోకి రావాలో నిర్ణయించే రాష్ర్టాల్లో మొదటిది ఉత్తరప్రదేశ్. 2014, 2019 ఎన్నికల్లో యూపీలో బీజేపీ మంచి ఫలితాలను అందుకుంది. రాష్ట్రంలోని మొత్తం 80 లోక్సభ స్థానాలకు గానూ 2014 ఎన్నికల్లో 71 స్థానాలను, 2019లో 62 స్థానాలను బీజేపీ కైవసం చేసుకుంది. ఈసారి మాత్రం బీజేపీకి ఇండియా కూటమి నుంచి గట్టి పోటీ ఎదురవుతున్నది. ముఖ్యంగా సమాజ్వాదీ పార్టీ.. బీజేపీకి మెజారిటీ స్థానాల్లో బలమైన పోటీ ఇస్తున్నది.
మరోవైపు, కాంగ్రెస్కు ఈ విడతలో కఠిన పరీక్ష ఎదురుకానున్నది. పార్టీ కంచుకోటలైన అమేథీ, రాయ్బరేలీ స్థానాలకు ఈ దశలోనే ఎన్నికలు జరుగనున్నాయి. ఈ నేపథ్యంలో మే 20న యూపీలో 14 స్థానాలకు జరుగనున్న ఐదో దశ ఎన్నికలు కీలకంగా మారాయి. ఈ 14 స్థానాల్లో గత ఎన్నికల్లో బీజేపీ ఏకంగా 13 స్థానాలను గెలుచుకుంది. కాంగ్రెస్ అగ్రనేత రాహుల్ గాంధీతో పాటు రాజ్నాథ్ సింగ్, స్మృతి ఇరానీ సహా ఐదుగురు కేంద్రమంత్రులు ఈ దశలో తమ అదృష్టాన్ని పరీక్షించుకుంటున్నారు.
కాంగ్రెస్ కోటల్లో గట్టి పోటీ
ఐదో దశలో ఎన్నికలు జరుగనున్న స్థానాల్లో కాంగ్రెస్కు కంచుకోటల్లాంటి రాయ్బరేలీ, అమేథీ స్థానాలు ఉన్నాయి. ముఖ్యంగా గాంధీ కుటుంబానికి ముందునుంచీ అండగా నిలిచిన స్థానాలివి. వీటిల్లో అమేథీని గత ఎన్నికల్లోనే కాంగ్రెస్ కోల్పోయింది. ఇక్కడ రాహుల్ గాంధీపై బీజేపీ అభ్యర్థిగా స్మృతి ఇరానీ విజయం సాధించిన సంగతి తెలిసిందే.
ఈసారి అమేథీలో రాహుల్ గాంధీ పోటీ నుంచి తప్పుకొని రాయ్బరేలీ నుంచి బరిలో నిలిచారు. అమేథీలో కాంగ్రెస్ తరపున కేఎల్ శర్మ.. స్మృతి ఇరానీపై పోటీ చేస్తున్నారు. రాయ్బరేలీలో రాహుల్ గాంధీపై బీజేపీ అభ్యర్థిగా దినేశ్ ప్రతాప్ సింగ్ పోటీ చేస్తున్నారు. అభ్యర్థుల ఎంపికపై చివరివరకూ నాన్చిన కాంగ్రెస్.. ఈ రెండు స్థానాలను తిరిగి గెలుచుకోగలదా అనేది ఇప్పుడు ఆసక్తికరంగా మారింది.
బీజేపీకి కీలక స్థానాలు
ఐదో దశలో ఎన్నికలు జరుగుతున్న స్థానాల్లో లక్నో నుంచి రాజ్నాథ్ సింగ్ మూడోసారి పోటీ చేస్తున్నారు. ఆయనపై ఎస్పీ అభ్యర్థిగా రవిదాస్ మెహ్రోత్రా బరిలో ఉన్నారు. మరో కేంద్రమంత్రి కౌశల్ కిశోర్.. మోహన్లాల్గంజ్ నుంచి పోటీ చేస్తుండగా ఆయనకు ఎస్పీ అభ్యర్థిగా ఆర్కే చౌదరి గట్టి పోటీ ఇస్తున్నారు. జలౌన్ స్థానం నుంచి కేంద్రమంత్రి భానుప్రతాప్ సింగ్ వర్మ ఆరోసారి విజయం కోసం ప్రయత్నిస్తున్నారు. ఫతేహ్పూర్ నుంచి మరో కేంద్ర మంత్రి సాధ్వీ నిరంజన్ జ్యోతి పోటీ చేస్తుండగా ఆమెకు ఎస్పీ కీలక నేత నరేశ్ ఉత్తమ్ పటేల్ బలమైన ప్రత్యర్థిగా బరిలో నిలిచారు.
కౌషంభి నుంచి బీజేపీ సిట్టింగ్ ఎంపీ వినోద్ సోంకర్పై 25 ఏండ్ల యువకుడు పుష్పేంద్ర సరోజ్ పోటీ చేస్తున్నారు. ఇక, రెజ్లర్లపై లైంగిక వేధింపులకు పాల్పడ్డారనే తీవ్ర ఆరోపణలు ఎదుర్కొన్న బ్రిజ్ భూషణ్ శరణ్ సింగ్ కుమారుడు కరణ్ భూషణ్ కైసర్గంజ్ నుంచి పోటీ చేస్తున్నారు. ఆయనపై ఎస్పీ అభ్యర్థిగా భగత్రామ్ మిశ్రా పోటీ చేస్తున్నారు. ఇవే కాక ఝాన్సీ, హమిర్పూర్, బాండ, బారాబంకి, ఫైజాబాద్, గోండా స్థానాలకు ఐదో దశలో పోలింగ్ జరగనుంది.